Hapdeng ka jingshongshit la plie paidbah iaka Meghalaya Games ha Wahiajer

Syllad | The Rising MeghalayaJanuary 22, 2025

U Myntri Rangbah Conrad K Sangma haka 21 tarik Kyllalyngkot ula plie paidbah iaka Meghalaya Games 2025 kaba hynriew ha madan Wahiajer Multi Sports Complex.

Ha kane ka jingplie paidbah la iadong ki ar angut ki symbud Myntri Rangbah u Bah Prestone Tynsong, Bah Sniawbhalang Dhar, Sport Minister Bah Shakliar Warjri, kiwei ki Myntri Sorkar AT Mondal, Dr. Ampareen Lyngdoh, Bah Comingone Ymbon, MLA Jowai Bah Wailadmiki Shylla bad kiwei kiwei.

Ha kane ka jingplie paidbah kaba shongshit bad kaba phuh kaba phieng la iadonlang ruh u Ambassador sha India, Embassy na Uzbekistan u Sardor Rustambaev.

Kane ka lympung bah ka jylla ka plie lad ia ki jingialehkai traditional sports kum ka jingleh kai Mawpoin, Rah Moo Khrah, bad An’Ding Oka.

U Myntri Rangbah haba kren hakhmat palat 15000 ngut u paidbah ba wan sakhi ha stadium bad ki nongialehkai palat 3500 ngut kiba la ïalum lang ha madan ïalehkai, ula ong “Ka jingialehkai kam dei tang ka jingjop takma; ki dei shaphang ka jingtei ïa ka jinglong, ka jinghikai ïa ka jingtrei shitom, bad ka jingpynroi ïa ka jinglong ryntih,” ong u Myntri Rangbah ka Jylla Conrad K. Sangma

U CM Conrad u la pynbna ba kane ka sorkar kaba mynta ka ju buh hakhmat eh ïa ki samla ka jylla, bad ka jingpynlong ïa kum kine ki lympung ban pyndonkam ïa ki sap jong ki bad kan kyntiew ïa ka sap jong ki kum ki briew shimet.

“Ki samla ki dei ka bynta kaba kongsan ha ka jingthaw polisi jong ngi. Baroh ki skhim kiba ngi pyntreikam na ka bynta kane ka Meghalaya Games kyrpang, bad kumjuh na ka bynta ki saw tylli ki jingialehkai kiba la jia ha ka por ba kane ka sorkar ka dang synshar, ki long ka jingpyni ia ka jingshimkhia jong kane ka sorkar ia ki samla jong ngi”, la ong u myntri rangbah ka jylla.

Katba ki nongialehkai bad ka madan kaba don palat 15000 ngut ki nongpeitkai ki dang ia lum bad sngap ia u Myntri Rangbah ka Jylla, u la iasam ia ki jingai jingmut kiba bha, da kaba ong ba haba u briew u ialehkai bad iakynduh ia ki jingshah rem, u dei ban pdiang ia ka jingshah rem bad ban trei shitom ban pynbha ia la ka jong ka sap.

“Ka jingïalehkai bad ka jingïashim bynta ha kum kine ki jingïalehkai ka dei shaphang ka jinglong ryntih, ka jingtrei shitom, ka jingpdiang ïa ka jingshah rem, ka jinghikai na kata ka jingshah rem, bad ka jingpynbha ïa la ka sap… ka dei shaphang ka jingtei ïa ka jinglong,” u la bynrap.

“Ngi pynthikna ba ïa kine ki jingïalehkai yn pynlong ha ka rukom ba kyllain namar ngi ngeit ba man la ka thaiñ ka don la ka jong ka bor,” ong u CM .

Ka jingpynkylla ïa ki jaka ïalehkai kan ym ai jingmyntoi tang ïa ki nongïalehkai hynrei kan ïarap ruh ïa ka roi ka par ban poi sha baroh ki bynta jong ki distrik jong ka jylla, u la ban jur.

“Ka dei shaphang ban wanrah ïa ki nongïalehkai jong ngi sha ki bynta bapher bapher jong ka jylla… Ngi kwah ban tei ïa ka jingïatylli hapdeng ki briew jong ngi,” u la ong da kaba pynksan ïa ka jingdonkam ba ki nongïalehkai kin wad bniah bad ïakynduh bad kiwei pat ki nongïalehkai.

U la ban jur ba ka jingpynlong iakane ka lympung na kwei ka jaka sha kawei ka ai lad ïa baroh ki district ban pynlong ïa ka Meghalaya Games.

“Ngi ngeit ba man la ka thaiñ, man la ka district, dei ban kyntiew bad ailad ban pynlong ïa ki jingïalehkai kiba kum kine. Da ka jingpdiang ïa kane ka jingïalehkai, shibun ki jingtei ki la jia ha ka thaiñ Jowai bad ha West Jaiñtia Hills hi baroh kawei,” u la bynrap.

U la pynpaw ruh ïa ka jingdonkam jong ki nongïalehkai ban sngewtynnad ïa ka jingïalehkai, watla ki donkam ban ïalehkai ban jop. “Kam dei tang shaphang ka jingjop; ka dei shaphang ka jinglong briew kaba kham bha, ban ïashim bynta, bad ban ïoh mad ïa kine ki por, namar kine ki jingkynmaw kin sah bad phi junom,” u la pynksan.