Hapdeng ka phuh ka phieng la pynlong ia ka Shad Suk Mynsiem ka Seng Khasi Laitkor Pyllun

Syllad | The Rising MeghalayaApril 28, 2025

Ka Seng Khasi Laitkor Pyllun ka tnad jong ka Seng Khasi Kmie ka la pynlong ia ka Shad Suk Mynsiem kaba ar sngi kynthih, kata ha ka 26 bad 27 tarik Iaiong ha Madan Laitkor.

La pynlong ia kane ka Shad Suk Mynsiem kaba iphuh iphieng shibynta ban ainguh ia U Trai Kynrad u Nongbuh Nongthaw ba Un theh sei ia ki jingkyrkhu ha ki khun ki ksiew ka Niam Khasi Tynrai.

Kum ban shu kdew ka Seng Khasi Laitkor Pyllun ka la pynlong nyngkong eh ia ka Shad Suk Mynsiem ha u snem 2007, bad dang shen ki dang shu dep ban rakhe ia ka jingdap 50 snem jong ka jingsdang ia ka Seng ha kane ka thain. Kumta, katba dang iaid ki sngi ki por ki dang khmih lynti shuh shuh ba ka seng kan nangphuh nangphieng bad nangroi nangiar ha kane ka Bri u Hynniewtrep Hynniewskum.

Ha kine ki ar sngi la sakhi ia ka jingdon ryngkat lang ki Rangbah Seng ka Seng Khasi Laitkor, ki tymmen ki San, ki rangbah na ka Seng Khasi Kmie, nangta ki dkhot ka Seng Khihlang, u Paiem Habapan Sing Syiem, Syiem Khynnah ka Hima Khyrim, u MDC ka Nongkrem Constituency, u Bah Kitborlang Syiem bad kiwei de ki kynrem ki lyndan.

Ka Shad Suk Mynsiem ka ba dei ka Shad Niam Shad Rukom, ka ieng ban pynkynmaw ia ka jingiadei ba iajan tam hapdeng ka Niam bad ka Kolshor. Kane ka shad ka pyni ia ka jingngeit ba tynrai bad ka jingai nguh ia u Trai Nongbuh Nongthaw. Kaba ha khmat duh jong ka jinglong Niam Khasi Tynrai ka long ban Kamai ia ka Hok, Ban Tip Briew Tip Blei bad ban Tip Kur Tip Kha.

Ka Shad Suk Mynsiem ka dei ka Shad Ainguh ia u Trai Nongthaw Nongbuh ban kyrpad kyrpon na u Blei ban thehsei ki jingkyrkhu kyrdoh. Ki Nongshad kiba bat ba ksoh ha la Niam Khasi Tynrai, ki hiar sha ka lympung shad ban pyndep pura ia ka bynta jong ki. Ki Thei Sotti ki ba long ki bynta ba kham kyrpang, ki ba pyni ia ka jinglong khuid long suba ki kup ki phong ia ka pansngiat kaba thew ia ka jinglong sotti ka jong ki. Katba ki Nongshad Shynrang pat, ryngkat ka wait u symphiah ki shad katkum ka jingngeit u Khasi Hyndai ba un long kum u rangbah ban ker ban da ia ka burom ka akor, ka ing ka sem, ka it ka hima baroh salonsar.

Ki Duhalia ryngkat ki tiar put tiar tem jong ki, ki don ka bynta ba khraw ha ka jingpynurlong ia kane ka Shad Niam, namar ba ryngkat ki sur put sur tem ba ih jong ki, lah pat ban iohi ia ki thei Sotti bad ki Rang kynsai ba ki shad katkum ki sur tem. Ka Shad Suk Mynsiem ka sakhi kum ka dak ba khraw ba hiar pateng la pateng ha ki Khun Khasi Khara ba bat hok ia ka Niam ka Rukom ba la buh bad bat da ki Tymmen Longshuwa.