Hapdeng u slap mih ki nongmihkhmat, ki ophisar bad ki paidbah ban pynkhuid ïaka sor Jowai

Syllad | The Rising MeghalayaOctober 2, 2019

JOWAI: Ka bor synshar District jong ka West Jaiñtia Hills District kala rakhe pyndonburom ïaka sngi kha ba 150 snem u Kpa jong ka Ri, u Mahatma Gandhi da ka jingpynkhuid shnong. Ia kane ka jingpynkhuid iew la pynlong da ka jingiatreilang ryngkat Jowai Municipal Board, Jowai Officers Club bad ki committee jong ki iew bapher bapher.

Kane ka jingpynkhuid shnong la ïashimbynta da ki shnong bapher bapher ha West Jaiñtia Hills District.

Ha une u snem ka jingïashimbynta ha kane ka jingpynkhuid shnong kala kham pher ha kaba wat ki nongshna aiñ ruh kila mih paidbah naduh u MLA ka Jowai u Ma Wailadmiki Shylla, u CEM JHADC u ma Thombor Shiwat bad kiwei kiwei ki MDC, u DC West Jaiñtia u Garod LSN Dykes, u Superintendent of Police West Jaiñtia Hills District u Bah Lakador Syiem ryngkat bad ki khynnah skul, ki nongshong iew.

U MLA Jowai, u Ma Wailadmiki Shylla haba kren ula banjur ïa baroh ban don ka jingkitkhlieh ban pynlong ïaka shnong ka thaw kaba khuid kaba suba bad ban kular ban pynlong ïaka Jowai khamtam ki jaka iew bad ki jaka paidbah ba ym dei ban bret ïaki jakhlia kat shaba lap bashem.

“Ka ñiut kaba ngi bret kat shaba lap ba shem ym tang ka pynsniew dur bad pynjakhlia ïaka shnong ka thaw, hynrei ka ktah ruh ïaka koit ka khiah lada kine ki jaka paidbah ki syrtap da ki jaboh jabain,” la ong u Ma Wailadmiki Shylla.

Ha kane ka juh ka sngi la sdang ruh ïaka Angikaar campaign ha Jowai ha kaba la plie da u MLA. Kane ka Angikaar Campaign kadei na ka bynta ban ïalap ban wanrah ka khuid ka suba ban hikai kumno ba bret ñiut bad ban tyngkai ïaka Um bad ka bording. Kane ka Campaign kadei ban pynurlong ïaka jingangnud u Kpa ka Ri ban pyntyllun ïaka skhim PMAY ban wanrah jingkylla haka imlang ka sahlang.

Kiwei kiwei kiba kren ki kynthup ïa u CEM JHADC, Garod LSN Dykes, Superintendent of Police Lakador Syiem, Additional Deputy Commissioner Kong R S Manners.

Ka Bor District kala pynlong ruh ïaka jingmareh jied plastic kaba sdang na Kiang Nangbah Stadium sha Kiang Nangbah Government College, Myntdu bypass, Amlarem Bypass, Stand War, DC office, Ladthadlaboh  bad la pynkut ha Kiang Nangbah Stadium.