Hapdeng u slap u phria, mih shongshit ki khun Niamtre ban shimbynta haka Chad Sukra

Syllad | The Rising MeghalayaApril 7, 2025

Ka Chad Sukra ka Seinraij Jowai haka 6 tarik Iaiong kala long kaba iaid beit iaid ryntih bad iphuh iphieng wat hadpeng ka jingther u slap ryngkat u phria.

Ka mat pdeng ka long “Ah Bei? Ah Bei Rymaw, Yi cha Bei ka Nongkylliang”. Ka Chad Sukra ka sdang haka miet 5 tarik da kaba la pynlong iaka drama kaba ai kyrteng ‘Thij Chwa’, katba ka 6 tarik pat kadei ka sngi ‘Mih Iaw’.

Haka jingialang kaba la long ha madan Ryngkaw kaba don ha Tpep Pale, la wan ban sakhi da u symbud myntri rangbah ka jylla Ma Sniawbhalang Dhar uba la synniang ruh 50 hajar tyngka shaka Seinraij Jowai.

La ioh ka jingkren pdiang na u President ka Seinraij Jowai Ma Hercules Toi, ka jingkren halor ka phang na u ma Dawanpoi Passah Executive Member, Seiñraij Jowai bad ki kyntien khublei na u General Secretary Seinraij Jowai Ma Arwotki Sumer.

Hadien ka jingialang ka la don ka jingshad surok ne shad Mih Iaw ha kaba baroh ki khun ka Seinraij kila ia shad kymbrum ryngkat ki sur ki rwai kiba pynsawa iaka shnong ka thaw naduh na madan Ryngkaw haduh ban da poi ha Iawmusiang.

Ha Iawmusiang la wan ban sakhi da ki paid riewngeit ryngkat ki riam ki beit tynrai kiba iphuh iphieng kumjuh ki sur shad sur rwai ba sngewthiang sngewtynnad kiba mih lyngba ki tiar put tiar tem u mynbarim.

Ki samla kynthei shynrang haki dong ki shnat ka shnong Jowai kumjuh ki shnong marjan ryngkat ka Seng Khasi Mawsynram kila shim bynta lyngba ki jingshad bapher bapher.

Ka ‘Chad Sukra’ kadei ka jingshad kaba ki Pnar ki pyni iaka dustur ka riti bad la pynlong ia katei ka jingshad hashwa ban bet ia u symbai u phniang haki hali ki pynthor kum ka dak ban ai nguh kyrpang iaka mei mariang kaba ai bam ai dih lyngba ki soh ki pai bad ai jaka shnong jaka sah halor ka met ka phat jong ka.

Hadien ka jingshad na Iawmusiang kala don pat ka jingshad surok bad leit sha ki bynta bapher bapher jong ki dong ki shnat ka shnong Jowai.

Katba ha ka por mynmiet kaba dei ka bynta kaba khatduh jong ka shad Sukra kala don ka jingshad ‘Kper Syntu’ na ki dong ki shnat ka Jowai ba la pynlong ha Iungwalieh Iongpiah.