Hapoh 10 sngi yn rai khatduh halor ka jingthung Chairperson bathymmai ka MSCPCR: Paul

Syllad | The Rising MeghalayaAugust 14, 2024

U Myntri ka tnad Social Welfare u Bah Paul Lyngdoh ha ka 13 tarik mynta u bnai u la pyntip ba ka tnad kan sa ai jingmut ia ka kyrteng kaba thymmai na ka bynta ka jingthung Chairperson ba thymmai jong ka Meghalaya State Commission for Protection of Child Rights (MSCPCR) hapoh ka shiphew sngi.

“Hapoh ka 10 sngi ngin lah ban pynbeit ia kane ka kam. Ngin sa phah ia ka kyrteng bad rah sha ka jingialang ka kynhun Myntri ba kan ai ia ka jingmynjur,” ong u Bah Paul haba kren sha ki lad pathai khubor.

“Ngi la dep ban ithuh ia ki santylli ki kyrteng. Kumta tang hapoh ka shiphew sngi ngin sa lah ban shim ia ka rai kaba khatduh,” u la ong.

Ha kaba iadei bad ka rai ban phah ia ki kyrteng thymmai, u Myntri u la ong ba kane ka la wan jia namar ka jingkyntait jong ka longkmie na Rilum Garo ha kaba ia ka kyrteng jong ka la dep ban phah na ka bynta ban thung kum ka Chairperson ka MSCPCR.

“Ha ka jingshisha ngi la dep ban ithuh ia kawei ka longkmie, hynrei ka la kyntait namar kam kwah satia ban shimti ia kane ka kam,” u la ong.