Hapoh 15 sngi buh thong ka Assam & Meghalaya ban sdang biang ka kam pynbeit pud

Syllad | The Rising MeghalayaAugust 21, 2022

Ka kylla kaba ar jong ka kam ia pynbeit pud bad sam hapdeng ka jylla Meghalaya bad Assam kan sa khreh ba kan sdang noh hapoh kine ki 15 sngi kiban sa wan, da ka jingpynkhreh ban thaw biang ia ki kynhun kumba la leh ha ka kylla ba nyngkong, kata ia ki Regional Committee.

Ha kane ka kylla kaba ar jong ka jingpynbeit ia u pud u sam, ki bynta kiba dang sah ban ia pynbeit hapdeng kine ki ar jylla ki long hynriew tylli, kiba lehse, kan dei kawei na ka kam ia pynbeit kaban kham jwat, namar kumba la iohi paw ha ka kam ia pynbeit kaba nyngkong, wat lada kidei ia ki jaka bym da don than eh katta ka jingiaknieh ia ki jaka puta, pynban, hangne hangtai ka la mih paw pat ka dak jingbym hun ki paidbah ka jylla ban shem bad iohi ba hadien ki bun bun ki snem, mynta kin ngat noh ha ka jylla Assam.

Ia ka rai ban sdang ia pynbeit noh ia ka bynta kaba ar jong u  u pud u sam, la shim ha ka jingialang ba la long mynta ka sngi ha nongbah Dispur, ha ka jingialang ba la don lang ki ar myntri rangbah ka Assam bad Meghalaya  u Conrad K Sangma bad u Himanta Biswa Sarma.

Kumban shu pynkynmaw ba ia ka bynta jong ka kam ia pynbeit ia u pud u sam ha ka sien ba nyngkong  la pyndep san bnai mynshwa  ha kaba la soi ia ka Memorandum of Understanding (MoU) kaba la rai ban pynkut noh noh shwa ia ki  6 na ki 12 tylli ki jaka hakhmat ka jingsakhi lang da u myntri kam pohiing ka ri u Amit Shah ha ka 29 tarik Lber ha New Delhi.

Haba kren sha ki lad pathai khubor, u Myntri Rangbah ka Meghalaya u Conrad K Sangma, u la iathuh ba ha kane ka jingialang kaba mynta ka sngi, ma u bad u myntri rangbah ka Assam u Himanta Biswa Sarma, ki la shim ia ka rai ba kin sdang ban pyntyllun noh sha khmat ia ka kam ban ia pynbeit pat ia u pud u sam jong ki 6 tylli ki jaka bad kine ki kynthup ia ka Psiar, Khanduli, Block I, Block II, Bardua, Mawtawar bad Langpih.

“Dei ha kane ka jingialang ba ngi la shim ia ka rai ba ha kine ki 15 sngi, ki  sorkar ki ar jylla kin khreh ban thaw ia ki Regional Committee, ia kaba baroh ki committee yn lam khmat da ki Cabinet Minister na baroh ki ar jylla kiba long kum ki chairpersons” la bynrap u Conrad, ha kaba u la pynpaw ruh ba kan don ruh ka jingkynthup lang ia ki dkhot jong ka  Karbi Anglong Autonomous Council (KAAC) kiban rung kum ki dkhot ka regional committee ka sorkar Assam.

Kawei na ki mat ba kham paw shynna eh na kane ka jingialang ka long ba ki arngut ki myntri rangbah ka Assam bad Meghalaya ki la pynpaw ba kin da leit ban ia don bynta lang ha ki kato katne ki jaka kiba hap ha ka Block I bad Block II.

Shuh shuh na ka liang jong u Conrad, u kyrmen ba kane ka kam ban ia pynbeit ia u pud u sam ha ka kylla kaba ar kan long kaba iaid beit ba iaid ryntih kumba la lah ban pyndep ia ka kylla kaba nyngkong, katno tam lei lei da ka jingkyrkhu ka jong u Myntri Rangbah duh ka ri u Narendra Modi bad u Myntri kam pohiing u Amit Shah, ka kam kaba sah yn lah ban pynbeit ryngkat bad ka jinghun mynsiem lang u paidbah  jong baroh ar jylla.

Katba na ka liang u Myntri Rangbah ka Assam u Himanta Biswa Sarma, u ong ba baroh ar ki sorkar jylla ba mynta ki la buh ia katta ka thong ba long katba ka long, kin ialeh ban pynkloi ha kaban pynbeit noh ia u pud u sam, kampher ba wat ki lai tylli ki jaka kiba hapoh hapoh u pud u sam jong ka  ka  Karbi Anglong Autonomous Council (KAAC), ki dkhot ki jong ka kin don bynta lang ruh ha ki regional committee ban thung da ka sorkar Assam.