Hapoh 30 bnai yn pyndep iaka Residential Skul ha Umladkhur: Lahkmen

Syllad | The Rising MeghalayaJanuary 9, 2023

Ka long ka jingkyrkhu ïaki nongshong shnong ka thaiñ War Jaintia khamtam ïaki longïing kiba duna ka ïoh ka kot, hadien ba u Myntri ka tnad pule puthi ka sorkar Jylla u Ma Lahkmen Rymbui uba dei ruh u MLA ka thaiñ ula wan buh maw nongrim ban tei ïaka Eklavya Model Residential School (EMRS) haka shnong Umladkhur, kaba hap hapoh ka Amlarem Sub-Division, West Jaintia Hills District haka sngi Nyngkong.

U Ma Lahkmen ula ong ia kane ka skul bei pisa da ka National Education Society for Tribal Students (NESTS), Ministry of Tribal Affairs jong ka  Sorkar India bad mang ban tei pyndep hapoh 30 bnai. Baroh ka jinglut jingsep kala kot 45 klur 79 lak 99 hajar tyngka. Yn tei ia kane ka skul da Company WAPCOS Ltd, New Delhi.

Nalor u Myntri ka tnad pule puthi la iadonlang ka Kong AP Syiem District School Education Officer kaba pyniaid iaka jingialang, u Dr. B. D. R Tiwari, IAS, Commissioner & Secretary, Education Dept, Meghalaya, ka Kong RM Kurbah, IAS, Director of School Education & Literacy, Sub Divisional Officer Kong YR Mawlong SDO Amlarem Sub-Division, u BDO u Dr. D Lyngdoh, ki nongialam shnong Umladkhur bad kiwei kiwei

Ka Kong RM Kurbah, IAS, Director of School Education & Literacy haka jingkren ka la ong kane ka residential skul ka don naduh klas 6 haduh klas 12 bad ka hap haka jingpeit ka Ministry Tribal Affair kaba angnud ban pynïoh ïaka ka jingnang jingstad khlem jingsiew kyrpang na ka bynta ki riewlum (ST) kiba shong basah ha Ri India.

U Ma Lahkmen Rymbui haba kren shuh shuh ula ai khublei ïaka dorbar Shnong Umladkhur bad ki kur kiba don bynta ban synñiang sngewbha da ka jaka kaba 15 acre ban tei ïa katei ka skul.

Ka jingwan jong kane ka skul kan ai jingnang jingstad ïaki khynnah ka thaiñ ka ban ïa ryngkat kyrdan bad kiwei ki skul hapoh India. Kane ka skul ymtang ba kan ai jingnang jingstad ïaki khynnah hynrei kan ai jinghikai ruh ïaki khynnah ban pyntbit ban ialeh iaka entrance JEE, NEET naduh na skul, la ong u ma Lahkmen.

Ula ong ba khnang ban nym sepei ka por bad duh jingmyntoi ki khynnah, u Myntri u kwah ba ïa kane ka skul dei ban sdang temporary shwa ïaka ha Nongtalang College.

Ula iathuh ba ka building ba thymmai jong ka Nongtalang College yn plie noh, haka 11 tarik une u bnai bad kito ki building kiba lait un pyrshang ban pan bad lada ki ai lad na bynta arsnem, yn sdang shwa shipor ha Nongtalang bad ynda la dep ïaka building jong ka EMRS yn rah pat sha Umladkhur hynrei um kwah pat ban jia ïa kane ka skul kumba jia haki por ba la leit.

Ula pynkynmaw ba haka por ka jinglong Myntri ka tnad pule puthi u (L) John Deng Pohrmen ula ong ïaka JNV Mukhla la jied jaka ba kan don ha khap Sohkha bad Nongtalang hynrei hadien la rah noh ïaka sha Khliehtyrshi ban sdang temporary.