Hapoh 30 sngi pan jingshai MHRC na ka sorkar halor ka jingjia ha Pashang

Syllad | The Rising MeghalayaMarch 18, 2020

Ka Meghalaya Human Rights Commission (MHRC) Shillong kala pan jingshai na ka sorkar jylla ha kaba iadei bad ka jingjia haka shnong Pashang halor ka jingshah tied shah bom ki khyndai ngut kaba la wanrah ruh ka jingduh ei ïaka jingim uwei u samla mynta u bnai Lber 2020.

Ka MHRC mynta ka sngi hapoh ka jingialam ka jong u Chairperson u jong, ka u Justice T. Vaiphei bad ki dkhot ba kynthup ia u bah PJP Hanaman bad kong B. Giri, ki la pan jingpynshai na ka sokar jylla hadien ba ka la shem ia ki khubor ba la mih ha lad pathai khubor, haba iadei bad ka jingmih paidbah ban ia tied bad bom ia ka kynhun ba khyndai ngut ki  samla ba dei napoh ka shnong Madanrting, hadien ba ki la wan phai iing na ka jingleit ban bam khana shapoh ka shnong Syntung.

Ka jingpan jingpynshai ka MHRC ka long halor ka nongrim jong ka Article 21 ka riti synshar jong ka ri, kaba ken shai kdar ba man la u nongshnong shnong, ym don hok ban knieh jubor noh ia ka hok  longbriew man briew ka jong u, lait noh tang ki bor synshar kat kum ba la pruid dak ha ki ain ki kanun.

Ki khyndai ngut ki samla ka kynthup ia Macmillan Kharshandi, Teiborlang Kharbyngar, Ricky Dkhar, Alfready Sohtun, Vishal Deb Verma, Bijay Singh, Rohit Suting, Banteiliang Kharumnuid bad Pappu Deka,

Ha kane ka jingiabom shnong  jong u paidbhur, uwei napdeng kine ki khyndai ngut ki samla, ba la tip kyrteng kum u Macmillam Kharchandi, u la duh ei ia la ka jong ka jingim, katba ar ngut na kine ki la mynsaw bad kiwei pat kila phet rieh sha ka khlaw ba marjan ban lait na ki kti jong u paidbhur.

Kine ki khyndai ngut ki samla ki la leit ban ia bam khana ha kane ka sngi kaba long artad kum ka dak ban ia lehkmen ia ka  sngi kha ka jong u Ricky Dkhar.

Ka daw jong ka jingmih u paidbhur ban tied ban bom shnong, ka dei tang namar katta ka jingkynnoh ba kine ki samla kidei ki menshohnoh.

Ka MHRC, kala shim khia bha halor kane ka jingjia bad ka la thoh sha ka sorkar jylla lyngba u Chief Secretary bad kumjuh sha u Director General of Police ban pan jingshai ba la leh aiu halor kane ka jingjia, kiei ki lad ki lynti ba la shim bad leh, kaba long kat kum ki kyndon jong ka hukum jong ka iing bishar ba hakhlieh duh jong ka ri (supreme court)  ha u bnai Naitung jong u snem 2018.

Ka MHRC, ka la dawa ba ia ka kaiphod kaba pura halor kane ka jingjia dei ban pynpoi hapoph 30 sngi naduh ba la mih kane ka khubor.