Hapoh 6 bnai yn shim rai ka sorkar halor ka jingthmu khang ia ka MCCL

Syllad | The Rising MeghalayaFebruary 22, 2024

U Symbud Myntri uba khmih ia ka Tnat Commerce & Industries, u ma Sniawbhalang Dhar haka 21 tarik Rymphang u la pyntip ba na ka liang ka  sorkar kan shim ia ka rai kaba khatduh la kan khang noh syndon ia ka karkhana pynmih dewbilat ba la rim tam ka jylla, ka Mawmluh Cherra Cements Limited (MCCL) hapoh ka hynriew bnai.

Haba jubab ia ka jingkylli hapoh ka iingdorbar thawain, une u Myntri u la ong ba  kane ka mat kaba iadei bad ka jingthmu ban khang noh syndon ia ka MCCL hapoh Sohra ka dang don mynta hapdeng ka jingbishar bniah da ka sorkar.

“Ia ka MCCL kaba don baroh 278 ngut ki nongtrei la khang khyrdep noh naduh u snem 2020.Hapoh ka hynriew bnai ngin sa lah ban shim ia ka rai ha kaba iadei bad ka jingthmu ban khang noh syndon ia kane ka karkhana dewbilat,” ong u Myntri.

Nalor kata u Dhar u la pynthikna ruh ba na ka liang ka sorkar kan khot ryngkat lang ia baroh ki kynhun kiba ia don bynta na ka bynta ban poi sha ka rai kaba biang tam.

“Nga pynthikna sha phi ba ngin shim ia ka rai kaba biang tam khnang ba yn ym don satia kino kino ki ban shah ktah,” u la ong.

Kumjuh ruh u Symbud Myntri u la ong ba kin shim ia ki sienjam ban khmih bniah ha kaba iadei bad ki nongtrei lada jia ba ka sorkar kan shim ia ka rai ban khangdam noh syndon ia kane ka karkhana.

Ia kane u Dhar u la pynpaw haba jubab ia ka jingkylli ba la wanrah da u nongthaw ain na Nongthymmai, u Bah Charles Pyngrope.Kumba ka long mynta u la ong ruh ba ia ka jingsiew sha kine ki nongtrei la siew katkum ka jingioh pisa.

Kham hashwa, u nongmihkhmat ka NPP napoh Sohra, u Gavin M Mylliem u la kyntu ia ka sorkar ba kan pyntreikam ia ka rai ha ryngkat ka jingiamir jingmut lang bad ki kynhun kiba ia don bynta bad ban pynthikna ba ka dei ban long na ka bynta ka bha ka miat jong ki nongtrei.