Hapoh lai sngi kem ki Pulit Khliehriat 4 ngut ki kynthei, 1 u rang haka jingdonkti ban khaii ia u drok ba shongdor 1.6 klur

Syllad | The Rising MeghalayaJuly 19, 2023

Hadien ka jingphla jong kawei na ki nongkhaii drok kaba la shah kem noh napoh ka iingwai ha Nongmensong, Shillong ki pulit ka Khliehriat ki la ioh ban kem noh sa ia arngut ki nongkhaii drok kiba dei na Manipur na ka nongbah Shillong ha ka jingkhynra kaba la long ha ka 18 tarik mynta u bnai.

U Additional Superintendent of Police, East Jaintia Hills District u Bah B Jyrwa ha u kyrwoh ba ula phah, ula ong ong ba kane ka la wan jia hadien ba ki pulit ka Khliehriat ki la wan poi ha Shillong ha ryngkat ka jingiarap ka kynhun ANTF ka East Khasi Hills District bad ki staff ka Rynjah Police Station kila ioh ban kem noh ia kitei ki arngut na Shillong bad wanllam shapoh Khliehriat na ka bynta ban leh ia kaba donkam.

Kine ki arngut kiba la shah kem ki dei kiba la tip kyrteng kum u Khailen Hoakip 42 snem rta bad ka Lheineihoi Hoakip 40 snem rta.

Lah ban kdew ba ki pulit ka East Jaintia Hills District, ha ka 16 tarik mynta u bnai ki la ioh ban kurup ia u drok heroin uba khia 197.35 gram ba shongdor haka iew ka pyrthei haduh 1.6 klur tyngka hadien ka jingpynap shrip hapoh ka petrol pump ha Nongsning. Kine ki arngut ki longkmie kiba donkti ki dei kiba tip kyrteng kum ka Hohoi Lhanghal bad ka Ling Haokip kiba wan napoh Silchar sha ka thain Khliehriat da kawei ka Tourist Sumo kaba don ia u register No MZ-04A-2996.

Dei lyngba ka jingphla jong kine ki arngut kaba la lam sha ka jingshah kem jong kitei kiwei pat, kynthup iaka Ngai Rami kaba khot sin Nano na Nongmensong, Shillong.