Hapoh u 2025-26 yn lah ban pyndep noh ia ka Shillong Medical College: Ampareen

Syllad | The Rising MeghalayaOctober 15, 2024

Ka Myntri ka Tnad ka Koit ka Khiah ka Kong Ampareen Lyngdoh ha ka 14 tarik u Risaw ka la pynpaw ia ka jingsngew skhem ba yn lah ban pyndep noh ia ka Shillong Medical College hapoh u 2025-26 da kaba ong ruh ba ki kam ki jam ki la bteng bad iaid shaid shaid.

Haba kren sha ki lad pathai khubor, ka Myntri ka la ong, “Ngi la don ha ka lynti ban ioh ia ka Medical College kaba ar ka ban pyniaid da ka Sorkar hapoh ka Jylla. Kyrmen skhem ba shen ngin sa lah ban pyndep noh ia baroh ki jingdonkam. Ngi la dep pynpaw teng ba ngi la buh ia ka thong ban pyndep noh hapoh u 2025-26”.

Haba pynpaw ba ki don katto katne ki sienjam ba kongsan kiba la dep ban shim, ka Myntri ka la ong, “Kawei kaba dang sahteng mynta ka dei ka Service Rules kaba dang bishar da ka Tnat Personnel bad hadien ba ladep rai bad mynjur ia ka Service Rules bad kiwei pat ki jingdonkam, ngi sa lah ban sdang noh ia kane ka Medical College.”

Nalor kata ka Myntri ka pyntip ruh ba ka Tnat ka la dep ban phah ia ka aplikeshon na ka bynta ka jingpyniasoh ia ka Medical College bad ka skul bah North Eastern Hill University (NEHU).

“Ka NEHU ka la dep ruh ban shong jingialang bad ka Tnad ka Koit ka Khiah, hynrei ia kane yn sa pynbna bad sa ai ia ka jingbishar da u paidbah ynda la pyndep lut nadong shadong. Ngim dei ban kren ei ei tad haduh ba ki bor ba dei khmih ki la shim ia kine ki rai,” ka la bynrap da kaba ong, “Mynta ngi dang pyndep lut ia ki kyndon bad ki rukom treikam, ka long kaba eh bha namar ka kynthup ïa shibun ki jingiakren ba thikna, ka kynthup ïa shibun kiwei pat ki jingdonkam, kiba ngi donkam ruh ban pyniahap.”

Ha kaba iadei bad ka Tura Medical College, ka Myntri ka la ong ba ka jingpyntrei ia ka jingtei mynta ka la iaid shaid shaid.

Kumjuh ha kaba iadei bad ka PA Sangma International Medical College jong ka University of Science and Technology, Meghalaya (USTM) kaba la ioh jingmynjur dang shen ban pdiang haduh 150 ngut ki samla pule ha ka MBBS course da ka National Medical Council (NMC), ka Myntri ka pyntip ba ka Tnad ka Koit ka khiah ka dang pynkhreh ban shna ia ka cabinet memo ban pynbeit ha kaba iadei bad ki kam ki jam baroh.