Hapyrdi i phooh i pheiñ da pynkut ya ka Lympung ki Khynnah Seng Khasi Seinraij ha Chnong Nongkynrih

Syllad | The Rising MeghalayaJanuary 21, 2024

Ha uni u snem kani ka Lympung ki khynnah Sengkhasi Seinraij daman ko ka sien wa 18 wei da pynman ya ka ha ka sngi Hat 20 tarik wa ka sngi Khyllaw 21 tarik Duiatra ha chnong Nongkynrih heithaw watip kam ka Madan Siej Kynden, Laskein Block, West Jaintia Hills kawa hap hapoh ka Elaka u Dolloi Raliang.

Hei ioh u sakhi ya kani ka Lympung ha ka sngi khatdooh dachem wa ki khynnah Seng Khasi Seinraij na kyllein ki loom Khasi-Jaintia hei peit I pynlai ki Nongsikai iong ki Shlem Sikai Niamtre-Niam Khasi wapher dawan ki wow yachimbynta chongchit hei I riam I beit wa ioophooh ioophein wei ioo chongkhia chongkun.

Ha kani ka step ya ka Lympung da pynlai da ka Tyngkai I Man Synnah wa ka Wailadmi Dkhar wei da kdar yahkhmat da i Ngoohblai Ngoohsyiem wa da siang dabooh da u Mehiapia Suchiang iong ka Seinraij Nongkynrih neitae pynbood wan ki kyntien pdiang burom na ka Kamwadamang Synnah iong ka Seinraij Nongkynrih. 

Ki arngut ki khynnah kiwa da yein wow e yei klam I kappe ha kani ka Lympung toh ka Dawakiru Malang na Seinraij Jarain East Jaintia Hills kawa da klam hajrong ka phang wa ong ‘Pynkyntang yei rynyien da ki adong Blai’ neitae ka Klistina Synteng wan da klam ko hajrong ka phang wa ong ‘Ka bynta ki khynnah ha ka Seng Khasi-Seinraij’ kawa da mihkhmat na ka Seng Khynnah Seng Khasi Pomlakrai, Mylliem Pyllun.   

Ha kani ka Lympung da wan sakhilang e mynsien leh ya ki khynnah da ki Dolloi, ki Chakri Niam iong ki Raij ki chnong wapher, ki manbei manpa, ki khynroo khyllood wa ki waheh wasian na ki tnat Seng khasi Seinraij wapher wapher iong ka Ri loom Khasi-Jaintia.

Neiliang ki bor peit bor pynlai kani ka Lympung kiwa kynthup iow General Secretary Rangbah S. Pyniaidsuk Lyngdoh uwa dachim ka bynta wow pynsniaw yei lai luti ka Sein kamjooh ki kyntien na u Treasurer Ma Gideon Kharmawphlang uwa da khana ya ka thong I angnood ka Sein wow kreh neibynta kammon u saindur saindar ya ki khynnah ha ki Shlem Sikai wapher dei wa pynmih ya ki kot Khanna Niam iong ki Raij ki chnong wapher kamjooh leh iow ye u yarap ya ki khynnah ha kiwi ki rukom ki wow e myntoi ya ki ha ka mynstep man kawi.  

U Rangbah Aiban Swer, (Retired) Additional Director Soil & Water Conservation Department, Govt. of Meghalaya hei yein wow e ki kyntien kam ka kongsan, dayaroh ko ya yahkhmat kani ka Lympung kiwa dachim ka yukit wakhia neibynta wow tyoor luti ya ki khynnah Seng Khasi-Seinraij heiyatoh wei  tip niam tip rukom, neitae kyrsu kyntu u leh ya ki khynroo khyllood, ki manbei manpa dei wa ong to man ki bru watip u ksooh u kune yei man kyrpang ka jaitbru Niawtrep Niawskum nadooh ka niam ka rukom, dustur riti khnang wa ki patein wa hadien iow tip ki u bood late yei yi iwa da yah da tyoor luti kam ki patein u Niawtrep Niawskum ha kani ka juk ka por wa katni.

Pachat u leh ki kyntien snein kyntien kroo wei e mynsien ya ki khynnah kamjooh ya ki khynroo khyllood dei wa ong kynmoo wow ri syndong  yei burom I akor na yung ha lait wei wow saindur saindar yei longbru manbru wa miat wabha ha ka nongrim iong ka Tipbru-Tip Blai wei Kamai Yei Hok.

Kyrpang chooh, kyrsu kyntu u ya ki nongsikai wa em ha ki tnat Sein Khasi-Seinraij wapher dei wa ong, yaleh wow pynjanai yei tip wei chemphang iongphi kat kam I yah ka juk ka por neibynta wow ye phi u kriñ ya ki khynnah iow man kiwa sniawsuk sniawka-it u leh yeiwon yeiwon I kam da ka luti iong I sniaw maya khamtam hei wow ye u saindur yei long I man wamiat wabha I iongki da ka luti iong I Ya Maia, Ya tylli wei Ya burom kylliang.

Ha kani ka Lympung nalor i klam, I kappe daioh leh ki rukom lehke pynwyrngia wa boon jait boon rukom kam I leh drama watbian kat kam ki parom iongrim, ki rwai, ki chad kiwa da leh da pynioo da ki khynnah Sengkhasi Seinraij, I purae ya ki ktien Tymmen kiwa man ki kyntien snein kyntien kroo ya ki khynnah ha jrong I burom I akor neitae I pynkup burom wa kyrpang leh ya ka Kong Mera Dkhar waman kawi na ki manbei wa sein was dang ya kani ka Lympung Khynnah Seng Khasi-Seinraij.

Khatdooh chwa wow ioh ki kyntien khublei na ka Opaiadaka Dkhar, da em chwa i ekti ya ka Dongmusa na u Waiphang Suchiang, Seinraij Nongkynrih Laskein Pyllun ha u Bansarabanbha Kharsawkpoh iong ka Seng Kynnah Seng Khasi Ri War Mihngi kawa man ka tnat Seng Khasi  wow chimkti u pynman ya ka Lympung wa 19 ki khynnah Seng Khasi-Seinraij wei da pynkut ya kani ka Lympung wa 18 da I pynhiar ya ka lama da u Dolloi ka Elaka Mynsoo.