Hato ka VPP kan khanglad ia ka jingwan ki kynhun nongtem nongrwai sha ka Jylla lada wan ha ka bor; ong u Rakkam

Syllad | The Rising MeghalayaDecember 17, 2024

U nongialam ka NPP bad Myntri Sorkar Jylla u Rakkam A Sangma ha ka 16 tarik Nohprah u la buh jingkylli ia ka liang pyrshah Voice of the People Party (VPP) la kan khanglad syndon ia ka jingwan ki kynhun nongtem nongrwai ha Shilling lada kan ioh ban shimti ha ka bor ha ka Jylla.

Kane ka jingkynthoh jong une u Myntri ka long ruh kum ka jubab ia ka jingkynnoh jong ka Seng VPP ba ki tamasa iaput iatem ki long kum ki dawai pynkoit shipor ne ‘Pain Killer’ na ka bynta ki paidbah ba kin klet ia ki kam bamsap bad ki jingeh kiba kum ka Jylla ka la mad.

“Lada jia ryngkhat ba lada shisien ka sngi ka VPP kan thaw sorkar kan khanglad ia ka jingwan jong ki kynhun nongtem nongrwai kum ka Shillong Chamber Choir ba kin iashim bynta ha Shillong. Kane ka dei kaei kaei kaba nga sngew ba kam dei kaba iahap na ka bynta ki khynnah samla ka jylla jong ngi..Ngam tip kumno ki thmu da kaba ong ‘Pain Killer.’ Hato dei namar kim sngewtynnad ia ki jingput jingtem? Kumta lada ngam bakla, kiba haiing jong ki, ki nongkyrshan jong ki, lehse ki la ia don lang bad u paidbah ha kato ka sngi ba wan tem u Bryan Adam,” ong u Rakkam.

“Lada jia ba ki wan ha ka bor, kata ka mut kin khanglad ia ki kynhun nongtem nongrwai ba kin wan ha Shillong. Kane ka long ka bym sngew iahap bad kaba pynduh mynsiem bad ka dei ruh ka khubor kaba ki khynnah samla ka jylla kin ym mynjur satia,” u la bynrap.

U Myntri u la ong ruh ba u kyrmen skhem ba kin dang don shuh shuh ki tamasa iaput ia tem kiba kham khraw shuh shuh ban ia ka concert jong u Bryan Adams ki ban dang wan sha Meghalaya.

“Lada u Rakkam Sangma un wan tem ha madan Polo hato ki paidbah kin wan sha Shillong? Hato ki hotel kin dap da ki briew? Yn ym don ba wan. Hynrei ha ka jingwan u Bryan Adam, ngi la sakhi ba baroh ki hotel ki la dap, baroh ki dukan ki la dep, ki kali kamai ki la dap bad kiba bun bah ki briew na kylleng ki jaka, kynthup na Assam ki la theh pisa sha kane ka jylla.Namar kata kam dei satia tang halor ka put ka tem,” u la ong.

U la bynrap ruh, “Namar kata lada don mano mano ha kane ka juk kaba mynta ki bym pdiang ia ka jingwan ki nongtem nongrwai ba pawnam ka pyrthei sha Shillong, kane ka dei ka kam kaba sngew bynniaw namar ki nongshong shnong ka jylla ki dei kiba bang ban sngap ia ka rwai ka siaw bad ka put ka tem bad kiba sngewtynnad ruh ban rwai.”