Hato la pynbeit shisha ia ka jingialang ki ar CM ha Khanduli?

Syllad | The Rising MeghalayaAugust 3, 2023

Hato ka don ka shisha ne em ka jingpynbeit kaba thikna hapdeng ki ar Chief Minister jong ka Meghalaya bad Assam ban don ka jingialang jong ki ha Khanduli ha ka Sngi Balang mynta ka taiew? ka long ka jingkylli na kiba bun balang mynta.

Ka jingtip kaba nyngkong eh halor ka jingialang jong ki ar Chief Minister ka long na ka shyntur jong u Executive Magistrate jong ka West Jaintia Hills District u Bah W Kharbuli ha ka sngi Nyngkong ha Namdong B.

Kane ka jingkylli ka la mih hadien jingapkhmih lynti jong ki nongshong shnong ka Khanduli ia katei jingialang jong ki Chief Minister jong ka Meghalaya bad Assam ha Khanduli ha ka sngi Balang, pynban kala long lehnohei namar la pynpep noh ha ka kynta kaba khadduh na ki daw ki bym tip satia.

Ia kane khubor bala pynpep noh shipor ia ka jingialang jong ki Ar Chief Minister la pynthikna na u Waheh Shnong ka Khanduli u Ma Yooshida Nongspung haba kren lyngba ka phone.

U Ma Nongspung u la iathuh ba u la ioh ka phone call na ki bor bahalor bala pynpep noh shipor ia katei jingialang hynrei iaki daw um tip.

Ha kawei pat ka liang, la ioh jingtip kaba thikna ban pyni ba kan don shisha ka jingialang ki ar Chief Minister ha Khanduli da kaba pynkhuid ia ki khyndew kiba lang ha surok, la sdang ia ka pandal bad la pynkhreh ruh ia ki helipad.