Hato yn mad jingeh ki paidbah na ka jingkhang iaid ba 9 sngi na jingkieng Umiam?

Syllad | The Rising MeghalayaMarch 21, 2024

Ka jingmaramot ia ka jingkieng dam ha ka pung Umiam ka la iaid shakhmat hadien ba kane ka jingkieng ka la tor bad buh jingma ia ka iaid ka ieng jong ki kali, bad mynta ka sorkar jylla lyngba ka tnat MePGCL ka la pynbna ruh ban khang ia ka iaid ka ieng jong ki kali nalor kane ka jingkieng naduh ka 31 tarik u Lber haduh ka 8 tarik u Iaiong bad yn shah tang katto katne ki kali ban iaid kata tang ki kali kit nongpang, ki kali ar shaka bad ki kali kiba don hapoh ka 4 ton kata ruh ha ki jingpyniaid da ki bor ba dei khmih.                                      

Kane ka rai ban khang noh ia ka leit ka wan jong ki paidbah nalor kane ka jingkieng bad ka ban neh  haduh 9 sngi lynter kan pynlong ia ki paidbah kiba ju iaid lyngba man ka sngi lyngba kane ka jingkieng kin hap pat ban pyndonkam ia ka surok Shillong Bypass, kata na ka lynti Shillong Airport ter ter ban mih sha Umrynjah sha Mawsiatkhnam bad shaduh ka Mawlai Mawtawar.                        

Mynta, ka la mih pat ka jingud jingnam na u paidbah nongleit nongwan khamtam kito kiba leit sha iew sha hat kiba kynthup ia ki nongrep kiba ju kit ju bah man ka sngi ia la ki mar rep ban die sha ki iew bad kiwei kiwei ki nongleit nongwan kiban hap ban mad ia ka jingeh kaba khraw tang namar ka jingiehnoh bein da ka sorkar jylla ban pynbha ia u ne u surok na Shillong Airport ban mih sha Mawlai Mawtawar namar ka jingsniew kaba la palat liam bad ruh ka jingrit jong kane ka surok.

Na ka liang ki katto katne ki nongleit nongwan ki la pynpaw ba ka sorkar jylla lyngba ka tnad PWD ka la dei shwa ban shim ia ka sienjam ban pynbha mardor ia kane ka surok (Alternative Road) hashwa ban khang ia ka iaid ka ieng ki paidbah nalor ka jingkieng dam, namar ka jingsniew bad ka jingrit ka surok na Shillong Airport, Umrynjah kan buh jingma ruh wat ia ka iaid ka ieng ki paidbah namar ka jingjur ki jingjia tyngkhuh kali bad ki kam sniew kiba lah ban ap ia ki paidbah nongleit nongwan.

Na ka liang ki nongniah kali kamai, kiba ju shakri paidbah ha ka leit ka wan ba man ka sngi, ki la pynpaw shai ba kane ka jingkhang ban iaid nalor ka jingkieng dam kan buh jingeh shikatdei ia ki nongniah kali kamai bad ki nongleit nongwan namar ka jingsniew bad ka jingrit jong ka surok Shillong Airport ban mih sha Mawlai Mawtawar bad lada ym banse ban hap ban iaid na kane ka surok na ka liang ki nongniah kali kamai ki la kyrpad ia ka sorkar ba kan maramot noh mardor ia kane ka surok lym kumta kim banse ruh pat ban kyntiew ia ka dor bai leit bai wan na u paidbah.

Kane ka jingkhang ban iaid kali kan treikam tang hynriew kynta kata naduh ka por 8 baje mynstep haduh ka por 2 baje janmiet. Ka MePGCL ka pyntip ruh ba hadien bala dep pyntrei ia ka kam, yn sa plie noh ia shiliang jong ka surok ba pynnoh sha ka phang jong ka wah, ba kin iaid ki kali kiba khia hapoh ka 4 ton.

Ka jingplie ia shiliang ka surok kan long ha baroh kine ki phra sngi haduh ka por 7 baje mynstep jong ka 8 tarik Iaiong. Nalor kata ka pyntip ruh ba hadien ka 8 tarik Iaiong, hadien ka por 7 baje mynstep, yn sa shah ban iaid sa ia ki kali kiba hapoh ka 15 ton na ka phang jong ka surok ba pynnoh sha ka liang ka wah.

Ha kajuh ka por ki Deputy Commissioner ka East Khasi Hills bad Ri-Bhoi District ba kin ithuh ia ki jaka hashuwa ban poi sha ka dam na ka bynta ban pynieng ia ki kali hapdeng ka por 8 baje mynstep haduh 2 baje janmiet jong ka 31 tarik Lber.

Shuh shuh la kyntu ia ka Tnad PWD ba kan shong bishar bad ithuh ia kiwei pat ki lynti iaid ha ka por ka jingkhangdam ba 6 kynta ia ka jingkieng ban iaid kali ha ka 31 tarik Lber ban lah pyniaid ia kiwei pat ki kali kiba khia palat ia ka 4 ton.