Her syrngiew ki paidbah ka shnong Sekurberia ba wan tur ka kynhun ki Hati khlaw

Syllad | The Rising MeghalayaDecember 4, 2024

Ki paidbah nongshong shnong jong ka shnong Sekurberia hapoh Hima Jirang kaba don ha khappud ka Meghalaya bad Assam ki la her syrngiew bad don hapdeng ka jingsyier bad hap peitngor na ka jingwan tur kynsan ka kynhun jong kumba 20 tylli ki hati khlaw ha ka janmiet jong ka 4 tarik Nohprah shapoh shnong bad ki jaka rep ha kane ka shnong.

Katkum ki khubor la iathuh ba kane ka kynhun ki hati khlaw ki la mih kynsan na kawei ka khlaw kaba don marjan bad ka shnong Sekurberia bad tur sha ki jaka rep bad pynjulor ia ki mar rep mar riang ha kane ka shnong.

Ki nongshong shnong katei ka shnong khappud ki la pyntip ruh ba ki hati khlaw ki ju wan tur sha ki Shnong ki thaw ha kum kine ki  aiom ot, ha kaba ki ju tur ban pynjulor ia ki jaka rep ia ki mar rep bapher bapher kiba la rep shitom baroh shisnem da ki nongrep jong kane ka shnong.

Nalor kata ki la iathuh ruh ba dei na ka jingwan jong kiba kum kine ki mrad khlaw khamtam ki hati kaba  la pynlong ia ki nongshong shnong ba kin hap ban ia ap shnong khamtam ha ki por mynmiet khnang ban pynher krad ia kine ki mrad khlaw ban lait na ka jingshah pynjulor jong ki mar rep.