Hero I-League Qualifiers: Jop ka Ryntih SC 2-0 kol iaka FC Bengaluru

Syllad | The Rising MeghalayaOctober 14, 2021

ka Ryntih SC ka la lah ba kan sei madan ia ka khubor lam kylla pongpet ha ka lympung ialehkai jong ka Second Division I. League, ha kaba kane ka kynhun na Shillong ka la lah ba kan pynliem ia kawei na ki klob ialehkai bna nam bad ba radbah bha ha ka ri ka FC Bengaluru da 2-0, ha ka jingialehkai ba la long ha sorbah Bangalore haka sngi Balang.

Ia kine ki artylli ki kol ka Ryntih Sc kaba dei artad ka jingjop ba tang kane ka kawei ha kane ka jinghiar iakhun ha kane ka lympung la thep ia ki da u Sheen Stevenson Sohktung bad ka kol kaba ar ka la wan ha ka kylla miet lyngba u Dawanchwa Carlos Challam.

Haba khmih ia ka thup kyrteng jong ki nongialehkai, ka Bengaluru ka la sei madan da ki rang ialehkai bna nam bad ba la mihkhmat ia kiba bun ki klob ha ka lympung ialehkai jong ka I. league ba kynthup ia u Shubhash Singh, Robin Gurung Kinchuk Debnath, Sanju Pradhah, hynrei ka jingdon jong kine ki rang ialehkai hakhmat ki rang ialehkai jong ka Ryntih SC, ki pynpaw ialade la kum ki kali rim bym lah ban tan bha shuh, kaba da kylla ka la ktah jur bha ia ka FC Bengaluru, kaba la duh syndon ia ka kabu ksiar ka jong ka ban jam sha ka kyrdan iakhun jong ak Round Robin league jong kane ka jingiakhun.

Haba phai sha ka jingiakhun, ka Ryntih SC naduh kaba sdang ka la sei ia ka buit bad ka bor ialehkai ka jong ki, kampher wat lada ki la tip shai ba ialade kim don lad eiei shuh ban jam shakhmat ha kane ka jinghiar iakhun ba nyngkong eh ka jong ki, hynrei kum ka kynhun, ki rang ialehkai hapoh ka jingialam jong u Banpynkhramnam Nongkhlaw, Meban Wahlang, Hardicliff Nongbri, Chesterpaul Lyngdoh, Padam Chetri bad kiwei kiwei ki la ieng iakhun tyngeh tad haduh ba ki khlem da ailad satia ia ki rang ialehkai ka FC Bengaluru ban tehlakam ia kane ka jingiakhun.

Ka kol kaba nyngokong kaba u Sheen u la ioh ba un thep ha ka kylla step ka dei kaba u la ioh ban da pynshong bha ia ka bol kham habar jong ka box, bad ha ka por ba biang bha dain ban khyrwit jam bha ia ka bol kaba la sum kum u khnam bad ir khih kein ka jar ka FC bengaluru.

Haba wan ban bteng ia ka kylla miet, ka jingshah tam shakhmat da shi kol ka kylla long ka thongbah ia ka FC Bengaluru FC, hynrei na ka bynta ka Ryntih SC, ka  ka kol ba la lah ban lam khmat da u Sheen ha ka kylla step, ka la plie lad ia ka ba kan ialehkai kat kum ka bor ba ki don halade.

Lada ia nujor ha ka jingiakhun kaba la dep pyrshah ia ka Madan Maharaj FC, ka shu dei shisha tang ka jingbymdonka bok ka nusip, kaba ka jingshah rem kaba tang shi kol ka wan hadien ka sur ialehkai kaba bha na kane ka kynhun ialehkai napoh ka shnong Mawlai, kaba mynta ka kynti ka jinglah ban pynliem pyrshah ia ka FC Bengaluru FC, ka long da shisha ka khubor kylla pongpet bad kaban pynsah jingkynmmaw ia ka AIFF ba ki kynhun ne klob ialehkai jong ka nongbah Shillong bad khamtam na ka jylla Meghalaya, lada ailad bad plie ia ki rynsan iakhun ba kum kine kin bun ki khun samla na ka dong ba dka thain kiban dang iai bteng ban sei madan ia ki rang ialehkai kum ki jong Aiborkhongjee, Eugeneson Lyngdoh, Aiban Dohling, Redeem Tlang bad kumta de ter ter.

Khyndiat ha kane ka jingiakhun uwei na ki samla Khasi ba dei artad u samla ialehkai barim ka Shillong Lajong FC u Kynsailang Khongsit u la ioh ban ialehkai pura naka bynta ka FC Bengaluru ha kane ka jingiakhun pyrshah ia ka Ryntih Sc

Satang kumba khyndiat minit ka por pynjlan (addl.time) u Chesterpaul Lyngdoh u la ioh pdiang ia ka red card na u referee hadien ba u la ioh ban pdiang ia ka yellowcard kaba ar na kane ka jingiakhun, hynrei kane kam shym la ktah eiei ia ka kynhun ialehkai ka Ryntih SC ban jam shakhmat ryngkat bad ka lai poin na kane ka jingiakhun.