Hiar Delhi ki heh ka NPP ban dawa pynrung ia ka ktien Garo ha ka 8th Schedule

Syllad | The Rising MeghalayaNovember 3, 2023

Ka kynhun ki heh nongialam ka Seng National People’s Party (NPP) hapoh ka jingialam jong ka MP ka Tura ka Agatha Sangma ha ryngkat ka jingsynran lang u Thomas A Sangma Lamphang ka iingdorbar ka Meghalaya, u Marcuise N Marak, Myntri sorkar bad u President ka A’chik Literature Society (Garo), u Dr. Caroline R. Marak  kila hiar sha Nongbah Delhi  ban kyrpad na ka bynta ban pynrung lang noh ia ka Ktien Garo ha ka thup ban ioh  ia ka jingithuh hapoh ka khyrnit ba phra jong ka Riti Synshar Ri ne ka 8th Schedule.

Haba kren hadien ka jingialang, u Lamphang u la pynpaw halor ka jingseisoh ha ka jingiakren bad u Secretary ka Ministry of Home Affairs (MHA) haka sngi Thohdieng ha New Delhi da kaba ong; “Ngi la pynlong ia ka jingiakren kaba seisoh ha kaba iadei bad ka jingdawa ban pynrung lang noh ia ka ktien Garo kumba la pynrung ia ka Ktien Khasi bad ki 37 tylli kiwei pat ki jait ktien ki ban sa ioh ia ka jingithuh hapoh ka 8th Schedule.

Na ka liang ki heh ka MHA hadien ba ki la ioh ia ka jingpynsngew halor kane ka phang ki la pynthikna sha ka kynhun ba yn sa kynthup ia ka ktien Garo hapoh ka list  jingdawa.

Ka Agatha Sanma MP ka la ong; “Ka la don ka jingdawa kaba jur na ka liang ki paidbah ba dei ban kynthup noh ia ka ktien Garo hapoh ka Eighth Schedule. Ki heh ka MHA ruh ki la mynjur ban kynthup ia ka ktien Garo hapoh ka official waitlist jong ki jait ktien da kaba pynshong nongrim halor ka jingkyrpad jong ka kynhun, bad kane kan plie lynti na ka bynta ka jingpynrung hapoh ka Eighth Schedule.”

Lah ban kdew ba ha u bnai Nailur 2018, ka Meghalaya Legislative Assembly ka la pass da ka resolution ban kyntu ia ka Sorkar Pdeng na ka bynta ban kynthup ia ka Ktien Khasi bad Garo hapoh ka 8th Schedule jong ka Riti Synshar Ri.Kane ka jingiakynduh ba dang shen ka dei ruh ka dak kaba kongsan ban pyniaid shakhmat ban pynurlong ia kane ka jingdawa kaba la slem bah.

Ia ka ktien Garo la pyndonkam ban kren ha ki santylli ki distirct ka Meghalaya, bad ruh ha ki katto katne ki thain jong ka Khasi bad Jaintia Hills, ka jaka ba shong ba sah da ki paid Garo.

Ia mynta, ki don 22 tylli ki ktien kiba la rung ha ka khyrnit ba phra ka riti synshar   ri bad kine ki dei ka Assamese, Bengali, Bodo, Dogri, Gujarati, Hindi, Kannada, Kashmiri, Konkani, Maithili, Malayalam, Manipuri, Marathi, Nepali, Oriya, Punjabi, Sanskrit, Santhali, Sindhi, Tamil, Telugu, bad Urdu.