Hiar ialap elekshon u CM sha Nongstoin; kyntu ia ki paidbah ban ym ngop ha ki jingkynnoh ba lamler

Syllad | The Rising MeghalayaFebruary 12, 2025

U National President ka National People’s Party (NPP) bad Myntri Rangbah ka Jylla, u Conrad K Sangma ha ka 11 tarik Rymphang u la hiar leit ialap elekshon sha Nongstoin ban pan jingkyrshan ia u kyrtong ka party u Bah Dressar Marngar na ka bynta ka elekshon sha ka Khasi Hills Autonomous District Council (KHADC) ka ban long ha ka 21 tarik Rymphang.

Ha ka jingkren u Conrad u la kyntu ia ki paidbah ba kim dei ban ngop ha ki jingkynnoh ba lamler jong ki seng sain pyrthei bapher bapher bapher kiba kynthoh lamler bad pyrshang ban pynphriang ia ki jingtip ba bakla hynrei ban ai ka jingkyrshan kaba radbah ia ka party NPP kaba synshar ia ka Jylla.

“Shibun ki jingkynthoh kin mih ha ka por elekshon, hynrei hadien ba la kut, ki paidbah sa shisien pat kin iakren biang halor ka roi ka par, ka kamai ka kajih bad ki jingkyrshan kiba ki donkam,” ong u Conrad haba bynrap da kaba ong, “Ka party jong ngi ka don ia ka jingbun paid eh hapoh ka iingdorbar thawain.”

Haba kdew halor ki jingkular jong ka party NPP na ka bynta ka bha ka miat bad ka roi ka par jong u paidbah, u CM u la ong, “Kiba bun kin ia kam bad khlei ia ki jingkular ha ka sain pyrthei, hynrei ngi don hangne ban shakri ia u paidbah bad ban wanrah ia ka roi ka par. Kane ka dei ka kata ka kam ha ka synshar khadar.Balei ba ngin pynleit jingmut ia ki jingkynnoh bym don nongrim, namar hadien ka elekshon kito kiba kynnoh kin shu jah rngai ha ryngkat ki kular jong ki. Kata ka dei ka ban jia hadien ka 24 tarik Rymphang.”

Haba kren halor ka jingkhang ia ka kam tih dewiong ha ka Jylla, une u khliehduh ka NPP u la ong ba dei tang ka NPP kaba la leit ban tynruh ia kane ka kam tad haduh ban da ioh ia ka jingjop bad ioh pat ia ka jingmynjur ban sdang noh ia ka jingtih dewiong ha ka Jylla da ka juk stad kaba mynta.

“Ki heh na ka Coal Ministry ki la dep wan jurip ruh ia ki par kiba don ha Rilum Jaintia bad shen kin sa wan jurip ia ki par kiba don ha West Khasi Hills kumjuh. Ngi la lah ban weng ia kawei na ki jingtynjuh kaba khraw, bad ngi kyrmen ba kane kan wanrah ia ka jingkylla kaba bha,” u la ong.

Na ka liang u CM u pynthikna ruh ia ki nongtih par tynrai ba kim donkam shuh ban iaid lyngba ka jingmynjur kaba pyrkhing na ka bynta ban tih par. “Ki nongtih shyiap bad kiwei kiwei ki par kiba rit kiba hapoh ka 10,000 sqft, ki la kyntu ban pyllait na ki kyndon kiba pyrkhing. Kum ka sorkar, ngi la iakren sha Delhi na ka bynta ban pyllait na ki kyndon kiba pyrkhing na ka bynta ki nongtih par kiba rit ba ria. Ngi don ia ka jingthmu ban pynthikna ba ki nongtih par tynrai kin ym hap ban iakynduh ia kiba kum kine ki jingeh.”

Nalor kata u CM u la pynpaw ruh halor ki sienjam jong ka sorkar ban kyntiew ia ki kam ialehkai sports, ka pule puthi, bad halor ki jingtei ha kylleng ka jylla. U la kdew ruh ba ka jingtei ia ka madan ialehkai phutbol bad ka madan ialehkai track-and-field stadium ha Nongstoin ka ieng kum ka jingpynshisha ia ka jingshimkhia jong ka NPP na ka bynta ki jingmyntoi jong u paidbah.