Hiar ialap ka District Nasha Mukt Bharat Campaign sha ki shnong ha Jowai ban iakhun ia u drug

Syllad | The Rising MeghalayaMarch 14, 2021

Kum shibynta ban ialap ban iakhun pyrshah iaka jingsniew u drok, ka District Nasha Mukt Bharat Campaign ne Drug Free India Campaign lyngba ka ophis jong ka District Social Welfare Officer, West Jaintia Hills District ryngkat ka jingiatreilang bad kiwei ki seng kala hiar sha ki shnong ki dong bapher bapher ha Jowai ban pynlong iaka jingpynshai paidbah halor ka jingktah u drok bad kiwei ki jingdih pynbuaid.

Ha ka 13 tarik Lber ruh ia kane ka prokram la pynlong ha ïungwalieh Loompyrdi Iongpiah ha kaba lawan ban iashimbynta da ki khun samla bad ki longkmie longkpa na ki sawtylli ki dong ba kynthup ia ka Chilliangraij, Umchangiar, Loompyrdi Iongpiah bad ka Loomkyrwiang.

Kane ka campaign kala sdang naduh u Risaw 2020 bad kan kut ha une u bnai Lber 2021.

Shwa ban sdang ia ka prokram ba la pyniaid da u Waiphang Chadap, Society for  Urban & Rural Empowerment, West Jaintia Hills. Ia ki kyntien maitphang na u ma Alan Niangti, Waheh Chnong Loompyrdi Iongpiah ha kaba ula ong ba ka jingpynhap ne kynthup ia ka District jong ngi  hapoh ki 272 tylli ki District ne ki Hot Spot Area ka long ka khubor kaba kum ki nongialam shnong ngi dei ban shimkhia ban leh ei ei namar ka jingdon jong ki briew ne ki khun samla kiba ngop ha ki jait jingdih pynbuaid kat nangmih ki sngi ki nangbun bad ruh ka ktah ym tang na ka bynta ka iing ka sem jongki hynrei wat ia ka imlang sahlang jong ka shnong ka thaw ruh.

Ka Daka Bareh, Society For Urban & Rural Empowerment, West Jaintia Hills kum ka riew shemphang haba ai jingkren ka la batai shaphang ki jait jingdih ne ki drugs ba long Legal bad illegal bad kumno ki briew ki shim ban mad ne sdang ia ki kat haduh ba kin da poi ha u pud jong ka jingkyrni bad shah teh mraw ha ki jait jingdih pynbuaid.

Shwa ban poi shaba kut jong kane ka prokram lyngba ki kyntien khublei na ka D Lywait, Society For Urban & Rural Empowerment West Jaintia Hills District, u Damehiwot Pde waheh Chong ka Chilliangraij ula ieng ban ai ka jingkren lyngkot bad buh ruh ka jingkyrpad ia ki bor sorkar ba kin shimkhia shuh shuh ban leh kiwei kiwei de ki prokram kiba long ka atiar ban iada ne ialeh pyrshah ia ki jait jingdih pynbuaid.