Hiar jurip ka Estimate Committee ia ITI building ha ka shnong Sakwang, South West Khasi Hills

Syllad | The Rising MeghalayaSeptember 7, 2023

Ka Meghalaya Assembly Committee on Estimates, hapoh ka jingialam jong u MLA ka Nongpoh u Bah Mayralborn Syiem, hynne ka sngi Palei ka la leit jurip ia ka jingtei na ka bynta ka Industrial Training Institute (ITI) ha ka shnong Sakwang, Mawkyrwat, South West Khasi Hills bad pynpaw ruh ka jingsngewhun ha kaba iadei bad ka jingiaid shakhmat.

Na ka liang u Chairman ka Committee u Bah Mayralborn Syiem u la pynpaw ruh ia ka jingangnud ba shen yn lah ban pyntreikam noh pura ia kane ka jaka aijinghikai ne institute. U la pynpaw ruh ba ki dang sah satang khyndiat ki kam kiba shabar kiba iadei bad ka lain bording bad ka jingtan um.

Une u Chairman u la ai khublei ruh ia ka Dorbar Shnong Sakwang halor ka jingnoh synniang ia ka jaka kaba heh kumba 4 akar sha ka Directorate of Employment and Craftsmen Training kaba hap hapoh ka  Tnat  Labour na ka bynta ka jingtei ia kane ka ITI ia kaba la khmih lynti ba kan pynmyntoi shibun ia ki samla ka district.

U la pyntip ruh ba kane ka ITI kan aijinghikai halor ki santylli ki jait kam, kaba kynthup ia ka Surface Ornamentation Technique bad Embroidery, Wireman, Office Assistant cum Computer Program, Multimedia-Animation-Special Effect, bad Driver cum Mechanic.

Kumjuh na ka liang u dkhot ka Committee uba dei ruh u MLA ka Mawkyrwat u Bah Renikton Lyngdoh Tongkhar u la kdew ba ki khynnah pule na ka district ha ki por kiba la dep ki hap ban leit sha kiwei pat ki district na ka bynta ki jingpule jong ki. Hynrei, da ka jingwan jong kane ka ITI, ki khynnah napoh SWKH kin ioh jingmyntoi shibun lyngba kane ka shlem aijinghikai. Ha kajuh ka por u kyrmen ruh ba shen kane ka ITI kan sa treikam noh.

Kiba la ia don lang ha kane ka jingleit jurip ki kynthup ia ki dkhot ka Committee, kata u Bah Adelbert Nongrum, ka Miani D Shira,  Wailadmiki Shylla, Arbingstone B Marak,  Damanbait Lamare,  Remington Momin nalor ki heh napoh Meghalaya Legislative Assembly.

Kane ka jingleit jurip ia kane ka ITI ka dei ruh ka bynta ka jingleit jurip ba arsngi jong ka Estimate Committee sha ki sawtylli ki district ka jylla, kata shapoh West Jaintia Hills District, East Jaintia Hills District, East Khasi Hills District bad South West Khasi Hills.

Ka Committee kala jurip iaka Residential School ha Byndihati, Sabahmuswang bad ka surok NH-6 na Lumshnong-Sunapur. Nalor iaka Science and Commerce College ha Mawphlang, ka surok Mawphlang Balat, kata na Lad Mawreng haduh Weiloi.