Hiar jurip ka JNC, EE-PWD, Waheh Shnong ia ka jaka ba buh jingma ha Elaka Sutnga

Syllad | The Rising MeghalayaAugust 2, 2023

Mynta ka sngi 2 tarik Nailar, ka Seng Jaintia National Council (JNC), Jalaphet Unit  ha ryngkat u Executive Engineer ka PWD (Khliehriat) u Bah M Kharnaior bad ki Waheh Shnong na Sutnga u Ma Eban Sutnga bad na Jalaphet- Bri Sutnga u Ma Moin Bareh Assistant waheh shnong ki la pynlong ka jingleit jurip ia ka jaka kaba hap hapoh ka Elaka Sutnga kaba don hajan ka jingkieng Syrbang namar ka jingima jong ka jaka riat kaba don ki maw heh kiba lah ban hap bad twa ha kano kano ka por bad kaba buh jingma shibun ia ki nongleit nongwan. 

Ha kane ka jingleit jurip na ka liang ka JNC la ialam da u Vice President, u Bah Phrangsngi Chyrmang ha ryngkat ka jingiasynran lang ki nongialam ka CEC kiba la pynpaw ia ka jingsyier kaba lah ban mih na katei ka jaka.

Ka JNC kala pynkynmaw ba ha kine ki khyndiat sngi ba la dep ka seng kala dep buh ruh ka jingkyrpad ia ka ophis PWD (Khliehriat) ban leit jurip ia katei ka jaka khnang ban wad ki lad ki lynti ban pynkhuid noh ia katei ka jaka ban lait na kano kano ka jingjia ba  sngewsih kaba lah ban wan jia ha kano kano ka por.

Ha kane ka jingleit jurip na ka liang u EE ula kular ban shimkhia ia kane ka kam katba ba lah bad hadien yn phah ruh ia ki nongtrei ban leh ia kaba donkam na ka bynta ka bha ka miat jong u paidbah.

Halor kane ka bynta na ka liang ka seng ka ai khublei  ia ka jingshimkhia jong u EE PWD bad ki waheh shnong na Sutnga bad Jalaphet kiba la kloi ban pynlong ia kane ka jingleit jurip sha katei ka jaka khnang ban lah ban khanglad na kino kino ki jingjia ba sngewsih.