Hiar jurip ka tnad PHE Water Resources ryngkat ka KYKWM iaka Wah Myntdu hadien bala ioh iaka report bym bit ka Wah Myntdu ban dih

Syllad | The Rising MeghalayaSeptember 15, 2021

Haka sngi Balang ka tnad Water Resources bad ka tnad PHE Electrical Division ha ryngkat ka Khooid Ya Ka Wah Myntdu (KYKWM) kila hiar jurip iaka jaka tan umbam umdih ka Jowai ha Mupiah ka bynta jong ka Wah Myntdu hadien bala ioh iaka report ba ka jingjngut ka um ka long palat liam.

Katkum ka report kaba la iohlum ka KYKWM ha u bnai Naitung 2021 ba ka turbidity ne ka jingjngut ka um kala long haduh 72 -82 NTU, katba ka jingthew kaba biang ban dih iaka um kalong tang hapdeng 1-5 NTU.

Ka KYKWM hadien ba kala ioh iaka report Water Analysis Report halor ka jingkiew ka jingngut ka um ha Wah Myntdu kala ujor sha ka bor synshar district jong ka West Jaintia Hills.

Haka jingjurip ia ka Wah Myntdu, u Executive Engineer, PHE, Electrical Division ma Paul Synnah ula kubur ba ka jngut ka um bad kane ka dei na jingwan ka roi ka par ne ka kam tei jingtei harud ka wah Myntdu.

Ula ong ba nakaliang ka tnad PHE naka por sha ka por kala lap ia kane ka jingjngut bad khamtam eh ha ka jingwan u slap ba nyngkong ka jur bha.

“Ban pynduna iaka jingjngut ka um kadei tang da ka jingiatreilang jong baroh kiba don bynta naduh u nongshong shnong, ki kontrak ba tei jingtei kum ki surok kim dei ban theh ïaka khyndew sha ka liang ba khyndew kan tuid sha ka wah kumjuh ki nongtih maw tih syiap,” la ong u Ma Synnah. Ula ong shuh shuh ba lada ioh ban tei ïaka dam kan iarap shibun ban ïoh pynlang iaka um bad ba iada iaka jingjngut ka wah Myntdu.

U Ma Synnah ula ong ruh ba nakaliang ka tnad PHE ha kane ka aiom tlang ban wan kin pynkhuid iaka dam ha Mupiah bad ban maramot iaka dam.

Ha kane ka jingleit jurip iaka wah Myntdu la iadonlang u waheh shnong Khimusniang nalor ki dkhot jong ka KYKWM bad kiwei kiwei.

Na ka liang ka seng Khooid Yaka wah Myntdu hadien ba ka la ïohi ïaka jingdap khyndew ka wah Myntdu ka pynpaw ba ka dap da ka jingsngewkhia bad ka kyrpad jur ïa u DC ba un sngewbha ban shimkhia ban wad ki lad ki lynti ban pynbha ïa katei ka bynta jong ka wah Myntdu khnang ban lait na ka jingtyrkhong um dih haka por tlang.

Ka seng Khooid Ya Ka Wah Myntdu ka la kyrpad ruh ïaka bor synshar District kumjuh ka JHADC ban pyntrei hok ïaka hukum jong ka NGT kata ban khang ïaka jingtih shyiap, theh khyndew bad pom dieng harud ka Wah Myntdu.