Hiar jurip kyndit ka MHRC iaka Jowai District Jail, lap ia kiba bun ki jingduna

Syllad | The Rising MeghalayaAugust 4, 2023

U Chairperson ka Meghalaya Human Rights Commission (MHRC) u Justice T Vaiphei haka sngi Thohdieng u la pynlong ka jingleit jurip kaba kyndit ia ka district jail kumjuh ia ka jaka pynbeit ne Correctional Home ha Jowai.

La synran lang ia u Vaiphei da ki dkhot jong ka MHRC kaba kynthup ia u B Giri, u PJP Hanaman bad u secretary Bah FM Dopth. Na ka liang ka Commission kala pynpaw ba kane ka district jail bad ka correctional home, Jowai ki la khapngiah namar ka dei kaba ngiam tang na ka bynta 120 ngut ki koidi, hynrei ka la hap ban kdup haduh 298 ngut.

Na ka liang ka Commission ka la bthah ia u  Deputy Superintendent jong ka District Prison bad ka Correctional Home, Jowai ba kin pynkylla shipor ia ka hall jong ka vocational training sha ka ward na ka bynta ki koidi khnang ban weng ia kane ka jingkhapngiah ha ki ward kiba la don lypa.

Ki la pynpaw ruh ba ia kane ka vocational training lah ban pynkynriah shapoh ka kamram Video Conferencing. Na ka liang ka Commission ka la pynpaw ruh halor ka jingdonkam ban shna shuh shuh ia ki kamram khnang ban weng ia kane ka jingkhapngiah hapoh ki ward.

Kumba ka long mynta ka don tang kawei ka painkhana hapoh kawei kawei ka ward kaba duna shibun ban pynbiang na ka bynta kumba 50 ngut ki koidi kiba don ha kawei kawei ka ward, bad kumta ruh ka long kaba donkam kyrkieh ban shna biang shuh shuh ia ki painkhana hapoh kine ki ward.

Shuh shuh ka Commission ka la hukum ruh ia u Deputy Superintendent jong ka phatok ban ai ia ka kaiphod ha kaba iadei bad ka jinglong jingman jong ki case pyrshah ia uwei pa uwei u kodi khnang ba ka Commission kan lah ban shim ia ka kam bad ki bor ba dei khmih jong ka ain na ka bynta ban pynkut noh kloi ia ki case jong ki. Da kaba shim ia kine ki sienjam kan iarap ban pynduna ia ka jingkhapngiah jong ka phatok.

Ha kajuh ka por na ka liang ka Commission ka la pynpaw ia ka jingbym sngewtynnad halor ka jingbym don jong u Medical Officer hapoh ka phatok ha kane ka jingleit jurip ka jong ki namar ki don shibun ki koidi kiba donkam ia ki lad jingsumar.