Hiar jurip kynsan ka CPCB sha Wah Myntdu hadien ka jingtih jingkhlong maw khyndew ban shna surok Jowai Bypass

Syllad | The Rising MeghalayaDecember 13, 2024

Ki heh ka Central Pollution Control Board (CPCB), Regional Directorate (North East) ryngkat u Dr H. Tyngsong Scientist – E Regional ka Ministry of Environment, Forest & Climate Change Govt of India kumjuh u Bah S Syiem Environment Engineer ka Meghalaya State Pollution Control Board, Shillong haka 13 tarik Nohprah kila hiar kynsan sha Myntdu ban pynlong ka jingtohkit halor ka jinglong jingman ka wah na ka jingshna iaka surok Jowai Bypass.

Ha kane ka jinghiar tohkit, kane ka kynhun kala la leit jurip iaki jaka theh khyndew ka tnad PWD kaba tuid sha liar Pamkam sha Myntdu kumjuh ka jaka ba shah ki khlong maw, khyndew na Mynkrem bad Myntdu.

Nalorkata kala leit jurip bad tohkit ruh halor ka jingtan um da u kontrartor na Mynkrem ban pyndonkam haba shna ia katei ka surok bad la tohkit bniah ruh halor ka jingshna Jowai Municipal board iaki duid ki nala ba tuid sha ka wah Myntdu naka hukum ka NGT.

Shuh shuh katei ka kynhun kala leit khmih bniah iaka jaka thep na ka jingot iaka khyndew ban shna surok ha kaba kila lap ba la don tang khyndiat ka jingtheh khyndew naka jingshna iaka surok kaba jngai palat 5 KM bad pynkiang ba 25 mtrs.

Kane ka kynhun kala pan naka ophis u EE PWD (Rds) Jowai division iaki kot ki sla ba ioh jingbit ban pynthyllem iaki dieng, ki lum bad tih maw ban shna surok.

Hadien kane ka kynhun, kala leit jurip ruh sha Urkhla Khimusniang ka jaka pynkhuid iaka Um ban sam sha ki longiing ka sor Jowai bad shim ruh iaka um ban tohkit iaka jinglong jingman na Urkhla bad na Mynkrem.

Iaka jinglap jingshem jong kane ka kynhun kan phah sha ka NGT.

Ha kane ka jinghiar jurip la donlang ruh ka Kong B Blah ADC, u H Nengnong EE PWD (Rds) Jowai Division bad u O Thubru AEE, Ma R. Challam SDO (E) PHE, Jowai sub division, Jowai, Manager ka M/s DCC nalor u Ma Khroo L Pariat President KYM bad ki waheh shnong Jowai kiba iakhun ban pynbha iaka Myntdu ka jingim jong jong ka pateng kaba mynta bad ka pateng ban dang wan.