Hiar jurip u MLA sha Lumparing ban tei ia ka Urban PHC ba la mang ha ka jinglut kaba 4. 99 klur tyngka

Syllad | The Rising MeghalayaDecember 13, 2023

U MLA ka South Shillong Constituency u Bah Sanbor Shullai haka 12 tarik Nohprah, ula hiar leit jurip ia ka shnong Lower Lumparing na ka bynta ban tei ia ka Urban Primary Health Centre ba la mang ha ka jinglut ka ban kot sha ka T.4 Klur 99 Lak.

Haba kren ha ka jingialang kaba lyngkot u MLA ka thain u la ai khublei kyrpang ia ka Dorbar Shnong Lumparing kumjuh ia ka Lumparing Sports Club namar ka jingpynioh ei ia kane ka jaka ban tei ia kane ka projek kaba donkam na ka bynta ka bha ka miat jong ki paidbah nongshong shnong jong ka thain. Nalor kata u la pynthikna ruh ba ka jingtei ia kane ka jaka sumar yn lah ban pyndep hapoh ka 30 bnai.

Ha kaba iadei bad kane ka projek ba la mang da ka Tnat ka koit ka khiah ka sorkar jylla, na ka liang u Bah Sanbor u la ai khublei kyrpang ia ka sorkar MDA hapoh ka jingialam u Myntri Rangbah u Conrad K Sangma halor kane ka mang tyngka kaba ka la pynioh na ka bynta ban tei ia kane ka jaka sumar.

Kumjuh na ka liang ki nongialam shnong kiba la ai jingkren kila pynpaw ka jingsngewnguh ia u MLA uba la shimkhia ban wanrah ia ki kam pynroi bapher bapher ha ka constituency kiba thmu na ka bynta ka jingmyntoi jong ki paidbah nongshong shnong jong ka thain.

Ha kane ka jingleit jurip la ia donlang ruh ka District Medical and Health Officer, ka  Dr Lyngdoh,  Executive Engineer ka Health Wing Bah RA Wanniang, ki heh na ka Tnat Health Department, Bah HB Wahlang Rangbah Shnong, Upper Lumparing, Bah Doncaster Shabong Rangbah Shnong Lower Lumparing, Shaiphar Wahlang Rangbah Shnong, Riat-Laban-Kynjat Phutbol, baroh ki Rangbah Dong jong ki laitylli ki Dorbar Shnong ka Lumparing Pyllun (Greater Lumparing), ki dkhot ka Lumparing Sports Club bad kiwei kiwei kynthup ia ki nongshong shnong.