Hiar ka JSU sha Khanduli, lap ba duna Pulit ban peit iaka jingrung jingmih ki bar jylla

Syllad | The Rising MeghalayaSeptember 5, 2019

KHANDULI: Ki nongialam ka Jaintia Students Union (JSU) ban khanglad iaka jingrung beaiñ ki bar jylla lyngba ki shnong khappud Assam-Meghalaya kala hiar sha ka shnong Khanduli ban khynra ïa ki briew kiba wan rung khlem kot khlem sla shapoh ka Jylla haka 2 tarik une u bnai.

Kane ka jingleit khynra ka JSU kadei hadien bala pynmih iaka draft National Register of Citizen (NRC) ha Assam ha kaba 19 lak ngut ki briew kim shym la rung kyrteng ha ka NRC.

Ha kane ka jingleit khynra sha Khanduli la ialam khmat da u President JSU Lawyerson War, General Secretary JSU u Jersom Shylla bad bad kiwei kiwei ki dkhot ka JSU.

Ka JSU kala lum jingialang ruh iaki Waheh Shnong bad ki VDP shnong katei ka thain ban kyntu ban shimkhia ban peit iaka jingrung jingmih ki bar jylla ha katei ka jaka khappud. Ka JSU kala iakynduh ruh ïa u Officer Incharge ka Saitsama Police Out Post ban kyntu ïa u ban shimkhia ha kaban khanglad iaka jingwan rung beaiñ ki briew na Assam lyngba ka West Karbi Anglong.

Ka JSU kala ong ba nakaliang utei u pulit ula pynpaw ba ki kynduh jingeh bha ban pyndep ïala ka kam ram namar ba duna briew ne pulit katei ka out post, hynrei na kaliang ka JSU namar ka jingduna pulit kala tyrwa ban ia trei lang bad ki bor pulit ryngkat bad ki VDP jong ka thain bad ka shnong Khanduli.

U Lawyerson War ula ong ba kin pynlong iaka jingkhynra iaki kali kiba rung ba mih na Rilum Jaiñtia ula phah ruh ia baroh ki tnad treikam ka JSU khamtam kiba don ha khappud Assam bad Bangladesh ba kin peitngor ïaka jingrung ki kali bad ki briew na bar jylla bad la bthah iaki nongialam ki tnad ka JSU ban pyntip sha ki bor pulit lada lap ia ki mynder ri kiba suba kiba dei na bar ri ne bar jylla.