Hiar ka KSU ban iasyllok bad ki shnong khappud ha East Jaintia Hills

Syllad | The Rising MeghalayaAugust 8, 2021

Hadien ba ki ar Myntri Rangbah ka Jylla Assam bad Meghalaya kila dep ban iakren ban pynbeit ia u pud u sam ha ki jaka ba iakhajia ha sorbah Guwahati, ka KSU Narpuh Circle haka sngi Saitjain hapoh ka jingialam u president KS Suchiang bad u Phanuel Tongper vice president lem bad ki dkhot ki la leit hiar sha shnong Ratachera bad Malidor ban ia syllok bad ki waheh shnong halor ka kam pud kam sam.

Ka jingleit hiar ka KSU sha kitei ki shnong ka long halor ka jingsuba syntiat bad jurip jaka ka sorkar Assam iaka shnong Malidor kaba dang hap hapoh u pud u sam ka jylla Meghalaya. Ka jingleit iuh kjat ka Assam ha katei ka shnong ka long la arsien la ong ka KSU Narpuh.

Shuh shuh ka KSU kala ong ba ka jingiakren pynbeit pud ki ar CM la rai ban pynbeit ia ki 6 jaka kiba hap haka jingiaknieh ha West Khasi Hills, Ri Bhoi bad East Jaintia Hills na Ratacherra, hynrei na nakaliang ka KSU kala pynpaw iaka jingsngewlyngngoh kumno yn pynbeit pud ha Ratacherra katba u pud u dang jngai sa 7 Km ne 8 km sha khmat shaduh sha shiliang jingkieng wah Malidor.

Ka KSU ka ioh ruh ban ia kynduh ia u waheh shnong Ratacherra uba dei ruh u MDC barim ka thaiñ Narpuh, Desous Pohshna. Une u rangbah ula kam bad na ka liang jong ka shnong ka la biang lut ki kot patta ne ki dulir (Land Holding) na district council ha kawei pa kawei ka jaka rep ba don ha khappud bad ka Assam.

Ka KSU ka kyntu ia ka sorkar jylla ban long phikir bad husiar bha na ka jinglong shalak bad buit poh ka Assam.

“Ka jingleit iuh kjat ka Assam ha Malidor dang ha kane ka taiew 05/08/2021 ka don eiei sha lyndet, namar katkum ka jingiathuh kitei ki nongshong shnong, ki bor sorkar Assam ki wan ki kylli ia ka epic, naduh mynno la seng skul bad ki la shondur ruh ia katei ka shnong, balei ki wan kylli kumtei? Hato kim tip mo ba ka hap hapoh ka jylla Meghalaya bad ka syrnot rangbah shnong la ai na JHADC. Kane ka jingleh ka Assam ka pyni ia ka jingleh donbor,” la ong ka KSU.