Hiar ka KSU sha Mukroh lap ba duna bor pahara

Syllad | The Rising MeghalayaDecember 14, 2022

Ka Khasi Students’ Union (KSU) Central Body haka sngi ba Ar kala hiar sha ka shnong Mukroh ban leit jngoh iaki longiing jong ki lanot shah siat iap ha ki pulit Assam kaba kala jia haka 22/11/2022.

Ha kane ka jinghiar ka KSU sha ka shnong Mukroh la ialam da u president KSU central body Bah Lambokstar Marngar bad u general secretary u Bah Donald V Thabah ryngkat ka jingiadonlang ki dkhot bad nongialam ka KSU West Jaintia Hills. Kine ki nongialam ka KSU kila jngoh iaki longiing jong ki lanot shah siat iap bad ban pynpaw ruh iaka jingsngewlem halor kane ka jingjia kaba sngewsih.

Ka KSU kala iakynduh ruh iaki pulit ap pahara ha Mukroh bad la iathuh ba duna ki pulit bad ki tiar iada.

Ka KSU kala ong ba kam pat don kino kino ki dak ki shin ban buh sorkar iaka BOP ha kane ka shnong. Ka KSU kala iathuh ba nongialam shnong kila pynsngew ba kin don haka jingeh lada ka sorkar kam lah ban buh iaka BOP haduh ba kut u pud ka shnong Mukroh.