Hiar ka Synjuk Waheh Shnong Ri Jaintia sha Block-I ban kdup iaki shnong ba shah iehbein ha ka liang ka roi ka par

Syllad | The Rising MeghalayaNovember 25, 2024

Da ka jingthmu ban wanrah iaka jingiatylli bad ban iatreilang na ka bynta ka bha ka miat ka roi ka par hapoh ka imlang sahlang, ka Synjuk Waheh Shnong Ri Jaintia (SWSRJ) kala hiar ban lum iaka jingialang bad baroh ki Dorbar Shnong kiba hap hapoh ka Elaka Labang Nangphyllut Pangam Raliang haka dong Umnan Barato haka 23 tarik Naiwieng.

Ka Elaka Labang Nangphyllut Pangam Raliang kadei ka Elaka kaba la pynkhie im biang da ka Jaintia Hills Autonomous District Council (JHADC) da kaba thung ia u Acting Dolloi jong kane ka Elaka bad ai Sanad ruh iaki 21 ngut ban long ki waheh Shnong ba pura jong ki shnong ha Block 1.

Ka Synjuk Waheh Shnong Ri Jaintia kum ka synjuk kaba heh duh hapoh Rilum Jaintia kaba peit iaka iap ka im jong ki Dorbar shnong, ki waheh Shnong bad ki nongshong shnong ha baroh ki Elaka ne ki shnong kiba la ithuh da ka JHADC bad kiba la ioh ia ka Sanad, ha kane ka kynti kala hiar sha khappud ban kdup ia baroh ki para doh para snam na ka bynta ban wad ki lad ki lynti bad ki lad jingiarap na ki bor pyniaid District bad na ka sorkar Meghalaya.

72 tylli ki snem ba la leit shadien, kine ki shnong ki sah umdum, ym don ka roi ka par ne ki lad iarap naduh ka um, ka surok, bording, ki jaka ai jingsumar kiba biang nalor kiwei kiwei ki lad jingiarap bad wat ka census jong ka Election Commission lyngba ka sorkar Meghalaya ruh kam pat ithuh iaki, la ong u nongialam rangbah ka Synjuk u Ma Arminius Lipon.

U Ma Lipon ula pyrto iaka sienjam jong ka JHADC kaba la ai ka jingithuh da kaba pynim bad kdup biang iaki shnong jong ka Elaka Labang Nangphyllut Pangam Raliang bad ha kajuh ka por ula kyntu jur iaka sorkar Jylla ba kan ithuh iaki kum ki khun ki khun ki hajar ki jong ka da kaba pynbeit noh kloi iaki kam ba sahteng kum ka jingpynbeit pud pynbeit sam bad ban kynthup lang ia baroh ki shnong Khasi- Pnar jong ka Elaka Labang Nangphyllut Pangam Raliang ban pynpoi noh sha ka jylla Meghalaya.

Ka Synjuk ka kyntu ruh iaki nongmihkhmat naduh ki MDC bad MLA ban iarap katba lah ban pynurlong iaka jingthrang jong ki nongshong shnong jong ka Elaka naduh ban pynioh iaka hok longtrai halor ka khyndew ka shyiap, ka Election Enrollment, ban pynioh iaki jaka pule, ki jaka sumar kiba biang nalor kiwei kiwei.

Ia ka jingialang la pyniaid da u Ma Malbi Timung Waheh shnong Ksehrynchang haka jingdonlang u MDC Barato Mukroh Ma Aiborlang Shadap, u Acting Dolloi ka Elaka Labang Nangphyllut Pangam Raliang Ma Proslin Samayang kumjuh ki nongialam ka synjuk naduh u General Secretary Ma Kampher Pohlong Waheh shnong Amlarem, Vice President Ma Ebormi Pale Waheh shnong Lumtrep Nongjngi, Ma Stelin Lamare Waheh Shnong Barato, Ma Kitlang Maskut Waheh Shnong Mukroh nalor kiwei kiwei.