Hiar khang tala ka JHADC 13 tylli ki dukan ha Umkiang
KHLIEHRIAT: Ka Jaiñtia Hills Autonomous District Council (JHADC) ha kane ka sien lyngba ka tnad Taxation kala hiar dalade sha ka shnong Umkiang, Elaka Narpuh, East Jaiñtia Hills ban khang tala ïaki 13 tylli ki dukan ki bym don kot don sla ban kamai kajih ha kane ka shnong.
U Licensing Officer (LO) jong ka tnad Taxation JHADC, Khliehriat bad ki nongialam shnong ka Umkiang ryngkat bad ki Pulit kila leit ban khynra ïa ki dukan kiba shong ki bar jylla haka 15 tarik une u bnai Risaw bad kila lap ba haduh 13 tylli ki dukan kiba pyniaid da ki bar jylla kim don kot don sla, kata ka trading license bad ki service license kaba ki trai bad nongbylla ki dei ban ioh na ka konsil ban buh dukan die mar, mar bam, jain bad kiwei kiwei. Napdeng kine ki dukan bar jylla don ki bym shym la renew satia iaka trading license jong ki.
![](https://www.syllad.com/wp-content/uploads/2024/09/JIT-Vacancy-823x1024.avif)
Kine ki dukan ba shah khang ki dei jong u, Salim Uddin, Taj uddin Chaudhury, Badrul Haque, Muksul Alam, Sabut Das, Dipok Thakur, Abdul Jalial Chaudhury, Safikur Rahman, Anita Bala Das, Depak Thakur, Shomim Uddin, Lakhi Rani Suklabaidya, bad u Amaz Uddin Barbhaya.
U Ma Winning Garland Sungoh, Executive Member ba dei khmih ïaka tnad Trading by Non Tribal ula ai ka jingïaroh ïa u Waheh Shnong bad Secretary Shnong ka jong ka Umkiang kiba don lang bad ai ka jingiatreilang ha kane ka jingkhyra kot ka JHADC bad ban khang tala ïa kine ki dukan jong kine ki bar jylla kiba khaii beaiñ khlem kot khlem sla.
Ula kyntu iaki nongialam ha rilum Jaintia ban bud iaka nuksa jong ka Umkiang bad ban iatreilang bad ka konsil ban khanglad iaka kam kamai kajih beain ki bar jylla ha Rilum Jaintia. Ula ban jur ïaki nongialam shong ban ai jingtip sha ka konsil lada ki lap ïa ki bar jylla kiba pyniaid ia kino kino ki kam ba kynthup iaka jingbuh dukan, kharkhana, shalan mar bad kiwei kiwei kiba khlem trading license khnang ba konsil kan leh ia kaba donkam.
Leave a Reply