Hiar ki bor district ka West Karbi Anglong bad West Jaintia Hills sha Lapangap hadien ka jingiakynad ki Pnar bad ki Karbi

Syllad | The Rising MeghalayaSeptember 28, 2023

Hadien arsngi bala neh ka thma siat jri siat sim kaba jur hapdeng ki Pnar bad ki Karbi ha ki thain Lapangap Tahpat kiba don ha ka khappud jong ka Meghalaya-Assam, ki bor pyniaid district jong baroh artylli district ka West Karbi Anglong Assam bad ka West Jaintia Hills District, Meghalaya kila pynlong ia ki jingiakynduh bad ki arliang mamla ha ka sngi Palei khnang ban wanrah biang ia ka jingshongsuk shong shngain ha katei ka thain.

Ki bor pyniaid district jong ka West Karbi Anglong District ha ka jingialam jong ka DC Krishna Baruah bad u SP u I Barua ki la pynlong ia ka jingiakynduh bad ki nongialam jong ki Karbi ha Tahpat ha ka por mynstep jong ka sngi Palei.

Hadien ka jingiathir jingmut sani, ki nongialam Karbi ki la mynjur ban wanrah biang ia ka shongsuk shongsain ban ailad ia ki Pnar ban rep ban riang bad ot ia u kba kynthup lang ha ki pynthor jong ki ha ka shnong Nongjrong. Tangba katei ka jingmynjur jong ki kan trei kam lada ki Pnar ki long kiba kloi ban jynrat noh ia ki tynrai dieng bala thung ha Lum Moo Pyrdet Pynthor.

Hadien katei ka jingialang ka DC bad u SP na West Karbi Anglong District ki la wan pat sha ka jingiakynduh bala pynlong ha ka shnong Lapangap haba ladon u DC ka West Jaintia Hills u Bah BS Sohliya, u SP u Bah C Syrti, u MDC ka Barato u Bah A Shadap bad u Waheh Chnong ka Lapangap u Bah Deimonmi Lyngdoh.

Ha katei ka jingiakynduh, ka DC West Karbi Anglong ka la ai khubor halor katei jingmynjur jong ki Karbi ryngkat bad katei ka kyndon kaba long ban jynrat ne phut noh ia ka symbai dieng bala thung da ki nong Lapangap.

Shuh shuh na liang ki bor pulit Assam ruh ki la kular ban ai jingiada ia ki Khasi Pnar ba kin leit ban ot ia u kba uba ki la rep ha Nongjrong.

Na ka Liang u DC West Jaintia Hills u long mynjur ia ka katei kyndon bad kila rai ruh ban leit phut ia kitei ki symbai dieng lashai ka sngi Thohdieng.

Katba na ka liang u Waheh Shnong ka Lapangap un lum ia ka jingialang paidbah mynta ka janmiet ban pynsngew ha ka dorbar ia kane ka jingdawa jong ki Karbi.

Kumba ka long mynta ki nongrep jong ka shnong Lapangap ki la sangeh ban leit rep sha ki lyngkha jong ki bad na ka liang ki Karbi ruh ki khlem wan ap shuh sha lum pynthor.

U Waheh Shnong Lapangap u ma Deimonmi Lyngdoh u ong ba na kaliang u DC ruh u la pynpaw ba kan bha ban phut noh ia ki dieng ban ia kaba duh noh ia u khaw u kba.