Hiar lute ki runar ia ka Petrol Pump ha Umran Dairy, ioh khung haduh T.4 lak

Syllad | The Rising MeghalayaAugust 26, 2024

Ha ka step sngi U Blei 25 tarik sawngut ki runar ki bym lah ban ithuh ki la lute i kawei ka petrol pump kaba don ha Umran Dairy, Ri Bhoi District ha kaba ki la ioh ban khung haduh T. 4 lak.

Ka khubor ka iathuh ba kane ka jingjia shah lute jong kane ka petrol pump Indian Oil Umran Fuels kaba don ha ka shnong Umran Niangbyrnai harud ka surok bah NH-6 ka la jia ha ka por 5 baje mynstep, kata ha ka por ba u manager jong kane ka pump u dang thmu ban plie ia ka petrol pump hadien ba kitei ki runar ki la patan bad teh ia ki kti ki kjat jong u kumjuh ia kiwei pat ki nongtrei jong kane ka petrol pump.

Nalor kata la ioh jingtip ruh ba ha kane ka jingjia une u manager u la ngat ha ka jingmynsaw na ki bynta jong ka kti na ka jingshah ot da ki kynja tiar ba nep ha ka  jingpyrshang ia khun ia kine ki runar kiba  la teh la khum noh ia u lem bad ki nongtrei katei ka pump.

Hadien kane kine ki runar ki la ioh ban rong noh ia ka pisa kumba T.4 lak kaba dei ka pisa ba la die ia ka umphniang ha ka 23 bad 24 tarik Nailar. Hadien kane kine ki runar ki la phet krad noh na katei ka jaka.

Tad haduh ba thoh ia kane ka khubor, ki bor pulit ka Ri Bhoi District, kiba la ioh jingtip halor katei ka jingjia, ki la hiar marmar sha katei ka jaka ban pynlong ia ka jingtohkit bad ruh ban pyrshang wad ia ki sakhi satar lyngba ki CCTV kiba la buh ha ki katto katne ki jaka jong kane ka petrol pump.