Hiar pynpra ka shnong Ratacherra iaka surok ba suba shna ki nongkhaii maw beaiñ na Assam

Syllad | The Rising MeghalayaJanuary 14, 2021

Ka Dorbar Shnong Ratacherra kala hiar sha Malidor ban pynpra iaka surok kaba la lur ha Malidor kaba suba jur ba la shna da ki nongkhaii maw beaiñ na Assam haka sngi Balang.

Ka Dorbar Shnong Ratacherra kala mih paidbah ban pynpra iaka surok ba la shna da ki briew kiba ym pat lah satia ban ithuh bad la suba jur ba ki dei ki nongkhlong maw ban ioh khlong maw beaiñ na katei ka wah.

Haduh bala thoh iaka khubor ym pat lah satia ban tip mano ban lur ia katei ka jaka da ka puh shilum ban suk ban leit sha ka bynta jong ka wah ha wah Malidor, kaba hap ha jaka khappud Meghalaya Assam (Barak Valley).

La kynnoh ba ka jingshlur jong ki briew ban leh ki kam beain ha katei ka jaka ka dei na kadaw ka jingbym shim khia jong ka sorkar Jylla ban iada iaki shnong ki thaw haka thain khappud na ka jingshah thombor haka Jylla Assam. Ka bor district jong ka East Jaintia hills bad ka tnad kam khlaw ruh ki dang sngap man man halor kane ka jingkhlong maw beaiñ ha katei ka jaka.

Haba iakren bad ki nongshong shnong la iathuh ba katei ka surok kadei ka jaka ba juh buh kali (parking) ki nongshong shnong haba ki leit sum leit saitjain bad ki sa iaid kjat pat lyngba ka lynti rit haduh ban da poi ha wah Malidor.

Ia katei ka surok kaba la lur pynheh da ki kali JCB la pyntrei haka sngi U Blei haka por ba kynjah ki nongleit sum nongleit saitjain sha katei ka wah, iathuh u Pynkhlain Dhar u samla na katei ka shnong.

Ula iathuh ba ki nongshong shnong kiba la thmu ban leit saitjain sha katei ka wah Malidor ki la iohi ia katei ka surok thymmai haka step sngi Nyngkong bad ki la pyntip mar mar shaki nongialam shnong bad ki la hiar jurip sha katei ka jaka.

Haka sngi ba Ar ki nongialam shnong ki la pynlong ka jingap pahara khnang ban lap ksai mano ba leh ia katei ka kam namar ki suba ioh ba dei ki khar Assam kiba shna ia katei ka surok khnang ban pynsuk iaki kali motor jong ki ban kit ban rong iaki maw kiba ki juh khlong beain ha katei ka wah.

Hadien ka jingbym lap ksai, ka Dorbar Shnong Ratacherra mynta ka sngi Balang ka la lum iaki paidbah nongshong shnong bad pynpra syndon ia katei ka surok.

Kumban shu pynkynmaw haka 8 tarik Nailur bad 30 tarik Nohprah 2020 ka Khasi Students’ Union (KSU) Narpuh Circle ka la lap da ki phew ngut ki khar Assam kiba wan khlong maw beaiñ na katei ka wah Malidor.

Ka KSU mar dor ka la phah pynhap ia ki maw kiba la kit hapoh trok bad beh krad iaki bad maham ba kim bit shuh ban wan khlong maw na katei ka wah kaba hap shapoh u pud u sam ka Jylla Meghalaya.

Ka KSU Narpuh ka la ai jingthoh bad iakynduh ruh ia u DC barim, hynrei kine ki nong Assam ki leh bymsuidniew bad bteng ban khlong maw na katei ka Wah.