Hiar pynsangeh ka Assam iaka jingshna surok ka Lapangap

Syllad | The Rising MeghalayaFebruary 4, 2021

Dangshen ka dorbar shnong Lapangap ha ryngkat ki sengbhalang ka KSU, FKJGP, JSM kila rai ban ailad iaka Assam ban trei iaka surok kaba Tahpat, Langkeroi, Lapangap lada ka Assam kam pynthud iaka jingshna surok ka Lapangap sha Khanduli, phewse ka Assam kam shym la burom bad kala wan ban pynsangeh biang iaka jingshna surok ki nongshong shnong ka Lapangap haka sngi Palei.

U Deputy Commissioner, West Jaintia Hills District, u Garod LSN Dykes ula phah da ka shithi sha Deputy Commissioner West Karbi Anglong haka 28 tarik u bnai Kyllalyngkot 2021 ban pyntip ba kan don ka jingtrei paidbah iaka surok Lapangap sha Khanduli bad ula pan ruh ka jingiatreilang ka sorkar Assam ban nym pynthud iaka jingthmu jong ka shnong Lapangap.

Ula pynkynmaw ruh iaka Joint Meeting kaba la long haka 20/10/2020 jong ki DC bad SP ki ar district.

Phewse kane ka jingthoh u DC kala shah khein dewthala ha ki bor synshar district ka Assam ha kaba kila wan ban khang iaka jingtrei surok.

La kynnoh ba u border magistrate ka Assam u Mongve Enghi uba la wan bad ka kynhun pulit ka Assam 4 kali kila pynsangeh bad ula ong ba ia kane ka surok ruh yn shna hi da ka Assam.

Ka dorbar shnong Lapangap kala thmu ban maramot iaka surok tang ban suk iaid ki kali na Lapangap sha Khanduli naduh Lapangap haduh Wah Ïong-O namar ba sniew palat liam kane ka bynta jong ka surok kaba ki shem jingeh bha ban leit ban wan.

Tang hadien katto katne por bala sdang ban maramot iaka surok la wan hiar saw kali ki pulit jong ka sorkar Assam ryngkat u Border Magistrate jong ka West Karbi Anglong District u Mongve Enghi ban pynsangeh shisyndon ia kane ka jingshna surok. Katba na ka liang ka Meghalaya la wan poi tang shi kali ki pulit jong ka Saitsama Outpost.

Haba ïakren bad u Waheh Shnong jong ka Lapangap u Deimonmi Lyngdoh ula pynpaw ïa ka jingsngew diaw halor ka jingshah pynsangeh noh ïaka jingmaramot surok da ka Assam watla ka jaka ka dang dei pura jong ka Meghalaya.

Ka Khasi Students’ Union (KSU) Lapangap Unit ka la pynpaw iaka jingsngewkhia halor ka jingbym burom bad jingbym khein snep ka sorkar Assam iaka shithi ba la phah da u DC ka West Jaintia Hills District sha U DC ka West Karbi Anglong District Assam.

“Ka long kaba sngewkhia ban iohi ba wat hadien ba naka liang u DC ula dep pyntip sha ki bor sorkar ka Assam ruh, hynrei mynta ka sngi katba ki paidbah ki dang ia mih naka bynta ban maramot ia utei u surok, kynsan lah wan pynban ki pulit Assam kiba la pynsangeh jubor iaki paidbah kiba la mut ban maramot ia utei u surok,” la ong u kyrwoh ka KSU.

U Saikil Sumer general secretary KSU ula kyntu iaki bor sorkar ba kan sngewbha ban tuklar bad ban pynbeit noh mar mar ia kane ka kam khnang ba ki paidbah kin iohlad ban maramot iaka surok ban suk ka leit ka wan.