Hiar pynsangeh ka bor District West Jaintia Hills iaka jingot surok ka Assam ha Khatkasla Psiar

Syllad | The Rising MeghalayaApril 12, 2023

Ka bor synshar district jong ka West Jaintia Hills District haka sngi Balang kala hiar ban pynsangeh iaka jingot surok ka sorkar Assam ha Khatkasla Psiar ki shnong kiba hap ha khappud Assam Meghalaya.

Kane ka jingshna surok ka sorkar Assam kala sdang na Umkhyrmi bad mynta kane ka jingot surok kala poi ha Riat Kyn-O bad Iurim Biam kiba hap haka shnong Khatkasla bad Psiar kiba hapoh ka Laskein Block, West Jaintia Hills District.

Kane ka jingthmu ot surok ka Assam ha kitei ki jaka ka dei kaba kala pyrshang la bun bun sien ban ioh kam trai iaki jaka puta, hynrei daka jingshimkhia ka bor synshar district la hiar ban pynsangeh ia kane ka jingot surok ka Assam.

U Executive Magistrate jong ka West Jaintia Hills District Bah Wankhraw Kupar Kharbuli bad u Border Magistrate West Jaintia Hills u Ma Barister Niang ha ryngkat bad u DSP AJ Sangma ryngkat ka kynhun ki pulit ki hiar sha kane ka jaka bad kila shem ïaki nongtrei surok bad ki kali JCB kiba dang trei ïa katei ka surok.

Katkum ka jingïathuh ki nongtrei, la ong ba ïa kane ka surok la pyntrei da ka sorkar Assam na ka shnong Umkhyrmi haduh Khatkasla haka jingjrong kumba 10 kilometer lyngba ka skhim jong ka sorkar pdeng.

Kitei ki nongtrei ki la ïathuh ba ka jingpyntrei ïa kane ka surok sdang naduh na Umkhyrmi bad la bun sngi kila ot khyndew ban shna iaka surok ban pyniasoh ia kine ki shnong.

U Bah Wankhraw Kupar Kharbuli ula bthah ïaki nongtrei surok jong ka Assam ban pyllum pyllang bad pynkynriah ïaki kali JCB bad trok Dumper jong ki bad ki nongtrei surok ruh ki la kohnguh ïa kane ka jingbthah da kaba sangeh ka jingpyntrei bad leit phai sha Assam.

Haba ïakren bad u Bah Wankhraw Kupar Kharbuli, ula ong ba ki la ïoh ka jingujor na u BDO ka Laskeiñ ba ka don ka jingpyntrei ïaka surok kala poi shaduh ka shnong Khatkasla bad haba ïoh ïaka jingtip na ka liang u District Magistrate ula bthah ban hiar jurip sha katei ka jaka ban lap ïaka jingshisha.

Ula ong haka jinghiar jurip la lap shisha ba ka don ka jingpyntrei ïaka surok bad haba wad jingtip na ki nongtrei surok la lap ba uba pyntrei ïa kane ka surok ne u kontraktor udei uba napoh ka jylla Meghalaya.

Ula ïathuh ba na ka liang ka bor pynïaid District kala ïakren bad u Kontraktor bad ki ïoh jingtip ba ïa kane ka surok la pyntrei lyngba ka skhim jong ka sorkar pdeng.