Hiar thma ki Pukni iaki dukan die doh ha Lad Demthring

Syllad | The Rising MeghalayaApril 18, 2023

Ki Pukni kiba la wan boi ha Lad Demthring, kaba don haka surok Dawki Amlarem Jowai kila sdang ban hiar thma ia ki dukan die doh kiba don harud surok bah haka sngi ba Ar.

Kine ki sim kila wan hiar ha kine ki dukan kiba don harud surok, ka long thik kumba hiar thma ha kaba da ka kynhun kila niom ia kawei ka dukan die doh kaba don ha katei ka jaka.

Kine ki Pukni dei kiba tip haka ktien phareng kum ki Himalayan vulture (Gyps himalayensis).

Kine ki sim kila wan boi ha ka surok ne ka lad ban leit sha ka shnong Demthring, ka shnong kaba jngai tang katto katne kilometre na Jowai kaba don sha shilliang ka Wah Myntdu, mynta kila neh ha katei ka jaka la kumba ar taiew.

Kane ka jingwan boi kine ki sim ha kane ka jaka ka dei ka sien kaba ar bad kane ka jaka ka dei kaba don iaki sem ot doh.

Ka jingdon kine ki pukni ha katei ka jaka kala khring ia kiba bun ban leit jngoh iaki khmatam iaki nongwan shangkai suwari na kylleng.

Ha kine ki khyndiat sngi namar ba biang ka bam ka dih, kine ki sim kim shym la tur sha ki dukan, hynrei mynta ka sngi kila tur sha ki dukan ban rong iaka doh.

Kine ki sim pukni ki don haduh 38 tylli, ha kaba na kaliang ka tnad Kam khlaw ruh kala ai ka jingiada ia kine ki sim pukni.

Kine ki sim Pukni kidei kiba la jan duhjait katkum International Union for Conservation of Nature (IUCN) Red List Threatened Species kumta ka donkam ia uwei pa uwei ban ai ka jingiada ia kine ki sim kiba pynkhuid ruh iaka mariang.