Hiar thma ki runar iaki jaka rep ha kawei ka shnong ha West Jaintia Hills

Syllad | The Rising MeghalayaOctober 16, 2020

U briew u dei u jingthaw uba don ka bor ban sngewthuh na baroh ki lai phew jingthaw, phewse ka jinglong jingman kaba la jia ha kawei ka shnong ha West Jaintia Hills District la paw ba u briew ula kylla long thik kum u hati bad ula pynjulor iaki jaka rep jaka riang jong ki paid nongrep.

Kane ka jingjia kala jia haka shnong Larnai, ka shnong kaba hap hapoh ka Thadlaskein Block. Ka jngai tang kumba 10 km na Ummulong. Haduh 26 tylli ki longiing kila hap ban iam kthang naba haka por ba kila dei ban kheit ia u soh uba kiba la bet haka lyngkha kiba don markhap bad ka shnong Maskut, Elaka Maskut.

U Waheh Shnong Larnai u Bah Koyas Kharbihthai, ula kynnoh ba haka Sngi U Blei ki runar kiba suba jur naka shnong Maskut kila wan ban thombor bad pynjulor lut naphpang iaki jaka rep jong ki 26 tylli ki longiing jong ka shnong Larnai.

“Baroh ki mar rep kiba la dei por ban kheit bad ban die noh sha iew sha hat, pynban ha ka Sngi u Blei  kila wan hiar thma ia kitei ki jaka rep ban pom lyngkhot lyngkhai ia baroh ki jhur jhep bad kiwei kiwei ki jingthung haduh ban da julor phom,” la ong u ma Kharbithai.

Ula ong ruh ba nalor bala pynjulor ia kitei ki jaka rep la pynpait ruh iaki jaka buh tiar rep kaba la synniang u MDC ka Ummulong-Moodymmai Constituency u ma Jesse Suiam haka dor T.50 hajar bad rong tuh lut ia baroh ki tiar.

“Ka pynsuba jur ia ngi ba ia kane ka kam la leh da ki nongialam shnong ka Maskut bad Dolloi Phrangki Rynjah bad u Waheh Shnong Kyrsiew Kharbithai. Ka daw kaba la pynlong ïaki ban suba ïa kitei ki nongïalam jong ka Elaka Maskut namar hashwa ban jia ka jingshah pynjulor ki mar rep ka la don ka jingmaham ïaki nongrep jong ka Larnai bad hadien ka jingmaham ka la jia noh ka jingshah pynjulor ïak jhur jong ki nongrep,” ula ong u Waheh Shnong Koyas Kharbihthai

Ula ong ba dei haka sngi Nyngkong jong ka taiew ba kila lap ba la julor ki jaka rep jong ki bad mar mar la mudui da ka jingujor ejahar ha khmat ki pulit jong ka Ummulong Beat House.

Ki nongrep ka Larnai kila iathuh ba shuwa ban jia kane ka jingjia, “U Waheh Shnong ka Maskut ula wan ban maham bad ula ong kane ka jaka ka hap ha elaka Maskut. Ula byrngem ba lada ki nongrep ka Larnai ki dang bteng ban rep ha katei ka jaka phi iohi ia kaei kaban sa jia….,” la ïathuh u Ma Kynsaibha Talang.

U MDC ka thaiñ, u Jesse Suiam ula hiar jurip ia katei ka jaka rep kaba shah pynjulor bad ula kular ban shimkhia ban pynioh lad jingiarap ia ki paid nongrep kiba shah ktah.

“Shisnem shiteng nga la long kum u MDC kane ka thaiñ, nga sngew duh thiah duh dem tang na bynta kane ka kam ïa khajia jaka rep, shiphang la wan ujor da ka shnong Moodymmmai, Tyrshang, Larnai bad haki khyndiat bnai wat ki nongshong shnong jong ka Shnong Puriang kaba don markhap bad ka Maskut ruh kila wan ujor namar ba shah pynjot ki mar rep jong ki bad baroh ki nongujor ki pharep beit tang ïaka Shnong Maskut,” la ong u Jesse Suïam.