Hiar u DC West Jaintia Hills sha ka thain Mukroh lap iaki jingtei beain jong ka Jylla Assam

Syllad | The Rising MeghalayaMarch 22, 2025

U District Magistrate West Jaintia Hills u AK Singh haka 21 tarik Lber dalade ula hiar jurip sha ki thain khappud jong ka shnong Mukroh ha kaba ula sakhi dala ki jong ki khmat jingshna beain iaki surok bad iaka kper slasha da ka sorkar Assam lyngba ka Karbi Anglong Autonomous Council (KAAC).

Ha kane ka jinghiar jurip u DC la iadonlang ka Additional Deputy Commissioner ka Kong B Blah, u Additional Superintendent of Police u Ishan Gupta bad u Assistant Commissioner Bah GH Passah, u Waheh Shnong jong ka Mukroh u Ma Kitlang Maskut, u MLA barim Ma Henry Lamin nalor kiwei kiwei de.

La sdang iaka jingleit jurip na ki thain Umlaphiah bad Umsalang jong ka shnong Mukroh haba ka KAAC lyngba u kontraktor jong ka, ka la pynjulor ia ki pynthor jong ki lai ngut ki nongshong shnong kata ka Kong Thal Lamin, ka Kong Bial Nartiang bad ka Kong Kobiang Dkhar na bynta ka ban shna ia ka surok na bynta ka jaka thung slasha.

Kine ki trai jaka kiba la don lang haka jingleit jurip ki la ud ki la nam ha u Deputy Commissioner halor ka jingleh dusmon jong ka KAAC. Ha kane ka jingleit jingjurip sha kitei ki thain la iohi ba ka la don ka jingpynjulor ia ki lum bad ka jingpom pathar ia ki dieng siej bad thang pathar ruh iaki dieng.

Hadien kane ki nongialam jong ka shnong Mukroh ki la ialam ia u AK Singh sha ka jaka Mootha Siang Kwai kaba long ka khappud jong ka shnong Mukroh bad ka Block-I ne West Karbi Anglong District, Assam.

Ki nongialam jong ka shnong Mukroh ki pynkynmaw ia u AK Singh halor ka jingdawa jong ki ban buh noh ia ka Border Outpost jong ki pulit Meghalaya ha Mootha Siang Kwai na bynta ka bha ka miat jong ki nongshong shnong.

Na ka liang jong u AK. Singh ula kular ba yn sa iakren bad u Deputy Commissioner jong ka West Karbi Anglong District (WKAD) ba kidei ban pynsangeh noh mardor ki jingtei beain ha ki thain khappud jong ka Mukroh.

Kumba yn shu pynkynmaw ka Sorkar MDA 1.0 haka 29 Naiwieng (November) 2022 ka la pynbna iaka rai ban shna noh ia ka BOP jong ki pulit Meghalaya ha Mukroh bad Tihwieh jong ka West Jaintia Hills District, ha Mooriap, East Jaintia Hills, ha Rani, Ri-Bhoi, ha Umwali, Lejadubi bad Langpih West Khasi Hills hynrei wat hadien ka jingshimti biang jong ka Sorkar MDA 2.0 la ar snem tam ka BOP jong ki pulit Meghalaya kam pat ieng satia ha Mukroh watla ka Dorbar Shnong Mukroh ka la iai dawa na ka por sha ka por ban buh noh ia katei ka BOP ha Mootha Siang Kwai.