Hikai ka JMB bad Scouts & Guides iaki khynnah skul ban pynkhuid iaka Jowai

Syllad | The Rising MeghalayaAugust 3, 2022

Ka Jowai Municipal Board ryngkat ka jingïatreilang ka Meghalaya Bharat Scouts & Guides, West Jaintia Hills kala pynlong iaka jingai jinghikai iaki khynnah skul ban pynlong iaka sor Jowai kaba khuid kaba suba haka sngi Balang.

Ia kane ka jingai jinghikai kaba tip kum ka Waste Management and Sanitation kaba hap haka Swachh Bharat Mission (Urban) la sdang ha ki lai tylli ki skul kiba kynthup iaka Govt. Boy’s Higher Secondary School, Govt. Girls Higher Secondary School bad ka Marianhill Higher Secondary School.

Ki nongialam ka Meghalaya Bharat Scouts & Guides kiba la ai jinghikai ki dei u Ohiwot Laloo, District Secretary, MBS&G-WJHD, Rising Kharngi (Scouts Master), Stopper Phira (Scout Master), CD Laloo (Guide Captain), Pet Dhar (Scouts Master), Lamisakani Dkhar (Guide Captain), u Julius Pakem, (Scouts Master), Teilangki Rymbai (Scout Master) bad ka Aidasuk Warlarpih (Guide Captain).

Ki riew shemphang jong ka Meghalaya Bharat scouts & Guides ki la kyntu ïaki khynnah ban don ka jingkitkhlieh haba ïadei bad ka khuid ka suba da kaba sdang shwa na lade bad ban long ka nuksa ne nongmuna ba bha ïa kiwei.

La pynsngewthuh ruh ïaki khynnah haba ïadei bad rukom pyllang ne bret ïaki jakhlia ne ki tiar ki tar ba mih na ki ïing ki sem da kaba pyndonkam ïaka Blue Bin bad ka Green Bin kiba ka Jowai Municipal Board ka la ai sha ki longïing na bynta ban pynsuk ïaka rukom pynlang ïaki ñiut ki jakhlia da ki briew ka Jowai Municipal Board ynda la dei ka sngi ban wan kit ïaki ha man ki dong ki shnat.