Hikai ka MRDS bad ka DCIC iaki nongshong shnong ka Bataw ban rep shynrai bad sengkam lajong

Syllad | The Rising MeghalayaMarch 21, 2021

Ka Maitlynti Rural Development Society (MRDS) kaba pyrshang ban kyntiew ïaka ka kam rep shynrai hapoh East Jaintia Hills District kala pynlong iaka jingai jinghikai ba ar sngi halor ka kam rep shynrai bad ka seng kam lajong.

Ia kane ka jingai jinghikai kaba la tip kum ka Youth Leadership Training Programme la pynlong haka sngi sngi Thohdieng bad Saitjain ka taiew kaba la dep ha Bataw daka jingiatreilang bad ka ophis u District Horticulture Khliehriat, ka ophis u General Manager District Commerce Industrial Centre (DCIC), Khliehriat bad ka bor shnong Bataw.

Haka jingai jinghikai la kyrshan ruh da ka ophis u Deputy Commissioner East Jaintia Hill District, Khliehriat. Da ki phew ngut ki nongrep jong ka shnong Bataw kila ioh jingmyntoi na kane ka jingai jinghikai.

Ki riew shemphang kiba la ai jingbatai bnaih ki long u Bah Akbar Malang HDO Khliehriat Block bad u Bah D. Passah Programme Officer District Commerce & Industries Centre, Khliehriat haka jingïadonlang u Waheh Shnong ka Bataw u Bhalang Suchiang bad u Deihok Sumer Secretary MRDS.

U Deihok Sumer haka jingkren maitphang ula ong ka kam rep shyrmit kadei kaba kongsan haduh katta katta bad na ka liang ka MRDS ka ka buh ïaka thong ban pynïar ïaka rukom rep shyrmit hapoh ka district.

Ula ïathuh ba ki shnong ha East Jaintia kiba pynmih bha ïa u shyrmit kumjuh u sying hynrei ki shem jingeh ban pynïaid ïew ïa u mar bad na ka liang ka MRDS ka la mih shakhmat ban thied ïa u mar ba ki nongrep ki pynmih.

U Deihok ula kyntu ïa kini kino ki nongrep, ki kynhun treilang, ki Village Organization, ki riewshimet kiba kwah ban rep shyrmit ki lah ban wan register hapoh ka kynhun ban ïoh ïa u symbai.

U Bah Akbar Malang ula batai shaphang ka rukom rep shynrai, ula ong u shynrai udei u jingthung uba don ka jingïapher na kawei ka jaka sha kawei. U shynrai hapoh Jylla khamtam ha Jaintia Hills u don lai jait u Lakadong, u Lacheiñ bad u Ladaw bala pynmih da ka ICAR.

Ula kyntu ïaki nongrep kiba don jingthmu ban rep shynrai ba kidei ban tip kumno ban jied bad sumar ïaki symbai bad ban ïada ban lait na ka jingbam khniang. Ki symbai khun kidei kiba bha ban thung. Ka por thung kadei ha u Ïaiong (April) ka por tih kadei ha u January bad ula batai kumno ban kyntiew ïaka ïoh ka kot ka kamai kajih jong ki lyngba ka rep shyrmit.

Katba u D. Passah ula batai shaphang ka skhim Prime Minister’s Employment Generation Programme (PMEGP) kaba la sdang naduh u snem 2008 ba la pynïaid da ka Ministry of Miscro, Small and Medium Enterprises (MSME).

Ula ïathuh ba ka PMEGP ka pynïasoh ïaki ar tylli ki skhim kata ka Prime Minister’s Rojgar Yojana (PMRY) bad ka Rural Employment Generation Programme (REGP).

Kane la skhim la mang na ka bynta ban ïarap ïaki samla khamtam haki thaiñ nongkyndong ba kin seng ïala ki jong ki kam ki jam ban ïeng hala ki jong ki kjat.

Ula ïathuh ba mynshwa ïa katei ka skhim la juh aplai tang shisien shisnem hynrei mynta la lah ban aplai ha kano kano ka por lyngba ka online.

Kumta ula kyntu ïaki samla ba kin wan shakhmat ban aplai ïa kane ka skhim jong ka sorkar pdeng ban seng kam la jong namar ka don ka jingïarap pisa 35% ha ki nongkyndong na ka jinglut jong ka kam kaba u/ka ki seng bad ha ki jaka sor ka long tang 25%.