Hikai ka SURE & Social Welfare ban shna sboh bad thung jingthung khlem dawai ïaki kynthei ha Muphlang

Syllad | The Rising MeghalayaJuly 19, 2019

JOWAI: Ka Society for Urban & Rural Empowerment (SURE) Jowai ha ryngkat ka jingiatreilang bad ka ophis District Social Welfare Officer West Jaiñtia Hills District, ka pynlong ïa ka jingai jinghikai ba lai sngi lynter na ka bynta ki nongrep kynthei halor ka rukom rep khlem pyndonkam dawai (Organic farming).

Kane ka jingai jinghikai kala sdang naduh ka 18 tarik Naitung bad kan kut haka 20 tarik Naitung ha ka Shnong Muphlang.

Ha ba sdang ïaka jingai jinghikai la don ka jingïalang kaba lyngkot ban plie ïa kane ka jingai jinghikai ha kaba la pynïaid ia ka program da Kong Coriniki Slong Field coordinator (SURE).

La ïoh ia ka jingkren lam khmat na u Rev. H.H. Mohrmen Secretary jong ka Society for Urban & Rural Empowerment (SURE), uba la ong ba kane ka training ka dei na ka bynta ban pynkhlaiñ shuh shuh ïa ka organic farming kaba ngi la trei hi naduh mynshwa.

Ula ong ruh ba ka sorkar ruh mynta ka la pynshlur ïa baroh ki nongrep ban rep khlem dawai (organic), bad kala sangeh noh ban ai ki sboh dawai umphniang bad kiwei pat ki dawai khniang ïa ki nongrep. Ha kane ka training yn ai jinghikai ïa ki nongrep ban shna lai jait ki sboh shna hi kiba ki nongrep ki lah ban shna dalade bad da kaba pyndonkam tang da ki tiar ki tar kiba don hajan. Nalor kata yn hikai ruh ha kaba shna ïaki dawai khniang kine ruh ki dei ki dawai khniang kiba khlem pyndonkam dawai umphniang hynrei tang da ki tiar ki tar kiba don hajan.

U Rev. Mohrmen ula ong ruh ba ka por kala dei ïa ki nongrep ba kin pyrshang ban song (packaging) ïa ki jingthung kiba ki pynmih da kaba pyndonkam da ki sla lamet ne sla kait khnang ban pynduna ïa ka pyndonkam plastic. Ha kaba ïadei bad kane ki PGS (Participatory Guarantee Scheme) kiba la kyrshan lyngba ka projek ‘No one shall be left behind’ kaba la ïalam da ka NESFAS (North East Slow Food and Agrobiodiversity Society) bad kaba la kyrshan da ka REC (Rural Electric Corporation) ba kin don ruh ki sticker ban tah ha kaba yn pynshisha ba ki dei ki jingthung organic.

U la ai jingmut ruh ba kum ki nongrep hadien ba kila ïoh ïa ka jingithuh ka PGS bad ki sticker, ki lah ban leit die ïa ki mar rep sha ki thliew ing (Home delivery), sha ki ophis bapher bapher kumta ter ter.

Haka sngi kaba nyngkong, u ma Habandajop Lyngdoh Master Trainer u lai ai jinghikai kumno ban shna sboh 18 sngi (Berkeley compost) bad Sboh wieh (Vermi Compost) bad ruh ki dawai khniang.

Ka jingthmu bala pynlong ïa kane ka training ka dei namar ba ki nongrep ki shem jingeh bha ha ka liang ki sboh bad ki dawai khniang, namar kata kane jingai jinghikai kan pynsuk ïa ki nongrep ban shna hi ïa ki sboh bad ki dawai khniang dalade.