Hikai shna sboh 18 sngi ka tnad kam rep ha Namdong B

Syllad | The Rising MeghalayaNovember 27, 2021

Ka ophis jong u District Agriculture Officer, West Jaintia Hills District kala pynlong iaka jingai jinghikai shna sboh ba shisngi haka shnong Namdong B haka sngi Thohdieng.

Kane ka jinghikai shna kadei ka Berkeley Compost kaba lah ban ioh iaka sboh tang hapoh 18 sngi. La pyndonkam ïaki phlang im, ki phlang ïap, eitmasi, ka um, ka jar, ka plastic bad u tyllai ban shna ia kane ka sboh kaba la tip kum ka sboh organic ne bym khleh dawai.

U Ma S Syngkon Agriculture Development Officer ula ai iaka jinghikai iaki paid nongrep ka Namdong bad da ki phew ngut ki nongrep kila ioh jingmyntoi na kane ka jinghikai.

Ha kane ka sngi la sam ruh da ki tiar sha ki nongrep ban shna sboh.

Naka liang u Waheh Shnong Namdong B, u Ma D.S.War u la ai khublei iaka tnad kam rep kam riang ba kila wan ban ai iakane ka training bad u la kyntu ruh iaki paid nongrep ba kin pyndonkam hok iaki tiar bad iaka jinghikai kaba kila ioh khnang ban pyndap iaka jingdonkam sboh haba thung ba tep.

Ki shnong kiba ioh myntoi na kane ka jingai jinghikai ki kynthup iaka Namdong-A, Namdong-B, Mukhnang Thadmynri, Ladmyngngor, Lumrot bad kremmyrsiang.