Hiran ka pla pisa ka JHADC dawa pynduna iaki nongtrei sha ka 1000 ngut

Syllad | The Rising MeghalayaJuly 26, 2019

JOWAI: U Awhai Andrew Shullai, Nongïalam jong ka Liang Pyrshah ha Jaiñtia Hills Autonomous District Council (JHADC) ula ong ba ka por kala dei eh ban pynduna noh ïaki nongtrei jong ka konsil sha ka 1000 ngut bad pyndam noh iaka jingthungkam thymmai ban pynduna ïaka jinglut jingsep ka konsil khnang ban lah ban pyniaid beit pyniaid ryntih iaki kam ka konsil kaba don mynta haka jinghiran ka iarong tyngka.

Ka JHADC mynta ka donkam haduh T.6.58 klur shibnai na ka bynta ban siew iaka tulop jong ki nongtrei bad ki Member jong ka District Council.

U Ma Andrew Shullai ula wanrah iaka Resolution halor ka jingtymbuin ka pla tyngka jong ka konsil namar ka jingduna ki lad pynmih pisa bad kawei ruh ka dei namar ka jingbun palat ki nongtrei ka council kaba la ktah bha iaka iarong tyngka ka council bad ka don ruh haka jingma.

“Ka Jaiñtia Hills Autonomous District Council Service Rules, 1981 katkum bala pynskhem ba jingdonkam nongtrei hapoh ka konsil ha baroh ki tnad ka dei ban long 489 ngut,” la ong u Ma Andrew Shullai. Ula ong ba haka mang tyngka jong une u snem 2019-20 ba ka jingdon ki nongtrei ka konsil kala kot 1490 ngut ha baroh ki tnad treikam jong ka Council.

Ka Rule 9 jong ka Service Rules jong ka council ka aibor ia ka Executive Committee ban thungkam katkum ka jingdonkam ka konsil katkum ka jingiaid ka por bad ban kynthup haka mang tyngka.

Ula kren bynñiaw ba kane Rule 9 kala ktah pynban ïaka konsil namar ba ka jingthungkam na kawei ka EC sha kawei pat ka EC ha kaba kila thungkam watla ka post kaba la thung kam dei eh kaba donkam kaba la wanrah ka jingbun jong ki nongtrei bad jingkhia ka jingsiew sha ki nongtrei.

Kumta ula ong ba ka donkam kyrkieh ïaka konsil ban pynbeit thymmai ïaka rukom thungkam khnang bad ka Service Rule ba kan nym mih jingeh hadien habud bad ka donkam ïaka ïing baroh kawei ban mynjur bad rai ban pynduna iaki sha ka 1000 ngut bad ym dei shuh ban thungkam hapoh ka konsil.

Baroh ki dkhot ka Liang Synshar kaba ïalam da ka NPP ba UDP naduh ki EM bad ki MDC kila pyrshah ïa kane ka Resloution, hynrei ki pdiang pat ba ka donkam ïaka konsil ban pynkylla thymmai ïaka Service Rules jong ka Konsil.

U Chief Executive Member, JHADC u ma Thombor Shiwat, U Phasmon Dkhar, Winning Garland Sungoh, Robinus Syngkon bad kiwei kiwei kila kyrpad ia u Ma Andrew bad weng iaka Resolution namar ba EC ruh kala pynkhreh ban pynkylla bad ban pynthymmai iaka Service Rules jong ka Council.

Hadien bala ïoh ïaka jingïatai halor kane ka Resolution, u Ma Andrew ula weng noh ïaka resolution da ka jingkyrmen ba ka EC kan leh ia kaba kala khlei hapoh ka ing dorbar.

Hashuwa ban ïatai ïa kane ka Resolution la wanrah ïaka Bill “The Jaiñtia Hills Autonomous District (Election to the office of Dolloi) Rules 2019” kaba don ka jingpynkylla haka phorm thep kyrteng jong ki kyrtong ki ban iakhun haka kam Dolloi khnang ba ki kyrtong kin iathuh iaki jingtreikam jong ki, kam runar ruser lada don bad kiwei kiwei kaba donkam u paidbah ban ioh jingtip kaba shai.