Khot bad wer u Director ICYM ïaki samla sha ka Convention ha Umkiang

Syllad | The Rising MeghalayaJanuary 8, 2020

JOWAI: U Director ka Indian Catholic Youths Movement (ICYM) Jowai Diocese, Rev. Phadar Manbha Pakem ula khot lawer ia baroh ki khun samla kynthei bad shynrang jong ka Jylla Niam Jowai ban wan iashim bynta ha ka Indian Catholic Youths Movement (ICYM) Convention, ka ban sdang naduh ka 10 tarik bad kan ban kut 12 tarik une u bnai haka shnong ha Umkiang, Parish Umkiang, East Jaintia Hills District.

Ula ong ba u snem 2020 u dei u snem jong ki samla bad yn rakhe ha baroh shisnem lynter bad kum ka dak ban sdang ïaka jingrakhe kin sdang da ka ICYM ha Umkiang.

Ia kane ka Convention ka ICYM yn wan plie da u ma Kyrmen Shylla MLA, uba long ruh u Myntri ka Sorkar Meghalaya ba dei peit ia ka tnat Social Welfare Etc. Ha ka por 1.00 PM yn sdang ka sien shong  jingialang (Session), yn ioh ia ka jingkren waiphang da ka Sister Sandaris, halor ka phang “Young People With Roots” ha kaba kin iatai bad iaphylliew jingmut bad ia kren halor ka phang “Ngi Dei Ka Mynta Jong U Blei” Nangta bud sa ka Cultural Competition hapdeng ki Samla na ki 18 tylli ki Parish jong ka Jowai Diocese.

Ha ka 11 tarik pat ka Session kan sdang naduh ka por 9:30 AM bad ha kane ka Session yn ioh ia ka jingkren na ka Sister Linda Dkhar halor ka phang “Jesus Ever Young” bad ha ka por 1.00 nohphai sngi yn don ka jingiaid Rally hapoh ka shnong Umkiang bad ka jingthoh Wyrta “Save The Earth Save Life”bad yn ioh ia ka jingkren halor kane ka phang da u Phadar George Shinning Lyngkhoi bad jan miet bud sa ka Singing Competition hapdeng ki khun Samla jong ki 18 tylli ki Parish jong ka Jowai Diocese.

Katba ha ka 12 tarik pat (Sngi U Trai) ha ka por 10.00 AM yn don ka jingknia Mass Iukharist bakhuid da u Most. Rev, Victor Lyngdoh DD, Bishop ka Jowai Diocese bad bud sa ka jingialang ki khun Samla ban pynkut ia kane ka Convention kaba la pynlong da ka Indian Catholic Youths Movement, ka Jowai Diocese pynkut ka kyrwoh ba la phah da u Director ka ICYM, Jowai Diocese, Phadar Manbha Pakem.