Hukum ka DM-EKH ia baroh ki dukan die dawai ban pyndait CCTV Camera

Syllad | The Rising MeghalayaNovember 21, 2023

Ka National Commission for Protection of Child Rights (NCPCR) ka la pynkhreh bad pyllait ia ka Joint Action Plan kaba thmu ban khanglad ia ki kam khaii bad pyndonkam ia ki dawai kum ki jingdih pynbuaid ne drok hapdeng ki khynnah da kaba pynpaw halor ka jingdonkam ba kyrkieh ban pynmih ia ka hukum ba kongsan na ka bynta ban khmih bniah ha kaba iadei bad ki dukan die dawai (Medical Shops) kiba buh ia ki dawai kiba hap ha ka thup H, H1 bad X drugs.

Kumta ruh halor kane na ka liang ka District Magistrate, East Khasi Hills, ka Kong RM Kurbah ha ka 17 tarik mynta u bnai ka la pynjari da ka kyndon Section 133 Cr.PC kaba hukum ba baroh ki dukan die dawai (Medical /Pharmacy) hapoh EKH kiba dei ia ki dawai kiba hap ha la thup ‘H’, ‘H1 bad ‘X’ kiba hap hapoh ki kyndon Drugs and Cosmetics Act ba ki dei ban pyndait ia ki CCTV Camera hapoh ki dukan jong ki.

Na ka bynta kane la ai por ia baroh ki trai jong kine ki dukan die dawai ba kin pyndait ia kine ki CCTV Camera hapoh ka artaiew, bad na ka liang ki bor sorkar ba dei khmih kin pynlong ruh ka jingleit jurip ia kine ki Camera ha kano kano ka por.

Kino kino ki dukan die dawai ne ki trai ki bym bud ia kane ka hukum ba la pynmih kin ngat ha ka jingshah pynshitom katkum ka ain.