Hukum ka High Court Meghalaya ia ka NHAI ban pynlong ia ka surok NH-6 kaba bit ban iaid kali

Syllad | The Rising MeghalayaSeptember 28, 2023

Ka Iingbishar High Court ka Meghalaya haka 28 tarik Nailur ka la hukum ia ka National Highway Authority of India (NHAI) ba kan maramot noh ia ka surok bah National Highway 6 ha East Jaintia Hills District  khnang ba kan long kaba bit na ka bynta ka leit kawan jong ki kali.

Ia kane ka hukum la pynbna haka jingshong bishar iaka Public Interest Litigation No. 11/2022 ba la ujor da u Kynjaimon Amse pyrshah ia ka NHAI bad kiwei.

Ka iingbishar ka la pynpaw ba katkum ka hukum kaba la pynmih ha ka 20 tarik u Nailur 2023, la file da affidavit na ka bynta ka National Highways Authority of India ha ka 27 tarik Nailur 2023, kaba kdew ba u Regional Officer ka NHAI uba don ha Guwahati ula dep wan jurip ia katei ka surok ha ka 16 tarik Nailur 2023.

Ia ki jingbthah ba la pynmih da u Regional Officer la rekod ha ka kaiphot lyngba katei ka jaka leit jurip ha ka 16 tarik Nailur 2023.

Ia ki jingbthah kiba dei biang la pynmih ha ka 19 tarik Nailur 2023 sha uwei na ki kontraktor bad sha u Project Director ka NHAI ban shim mardor ia ki sienjam ban maramot ia baroh ka shilynter ka surok NH-6 naduh Jowai sha Ratacherra na ka bynta ban pynsuk ha kaba iadei bad ka leit ka wan jong ki kali.

Nalor kata la bteng ruh ban pynbud ia ki shithi kiba kdew khamtam ha kaba iadei bad ki artylli ki jaka kiba kham kongsan hapoh Khliehriat bad ka surok hajan ka tunnel ha Sonapyrdi.

Ka shithi u Regional Officer ka donkam ban kdew shai ha kaba iadei bad ki jaka kiba kynthup, ha kaba ka iingbishar kham hashwa kam shym la iohi dak ha kaba iadei bad kino kino ki lynti surok ia kiba lah ban maramot kat haduh ka 15 tarik u bnai Risaw 2023, bad ba ia ka jingmaramot ba shipor na ka bynta baroh ka 57 km ka surok dei ia ka ban pyndep noh kat haduh ka 15 tarik u Naiwieng 2023.

Na ka liang ka iingbishar ka la ong ruh ba ka kyrmen ba ka jingpyllait ia ka pisa kaba biang na ka bynta kan ka jingpyntrei ia kane ka surok.

“Kane ka iingbishar kam sngewtynnad ha kaba iadei bad kane ka jingiaphah shithi hapdeng ki heh ka NHAI lane ia ki jingbthah kiba da ka jingthoh ba la ai sha ki kontraktor, hynrei kaba donkam ka long lano ka kam kan sdang bad lano yn pyndep khnang ba kane ka surok kan long kaba bit na ka bynta ban iaid kali,” ong ka hukum ka iingbishar ka Meghalaya HC.

Nalor kata kala bthah ruh ia u Deputy Commissioner ka East Jaintia Hills ban pynkhreh ia ka kaiphot ba haduh katno ka jingtrei kala iaid ha sor Khliehriah bad palat ia ka Khliehriat haduh ha Lumshnong.