Hukum ka ïingbishar Meghalaya HC ban pynkynriah kam mardor ia u SP ka EJH

Syllad | The Rising MeghalayaDecember 20, 2023

Ka iingbishar High Court ka Meghalaya haka 19 tarik Nohprah ka la hukum ia ka Tnat kam pohiing ka sorkar jylla bad ia u Director General of Police ba kin pynkynriah kam noh mardor ia u Superintendent of Police ka East Jaintia Hills District bad ban thung bujli da uwei pat u ophisar uba biang ha ka jaka jong u.

Ka iingbishar ka la shim ia kane ka rai hadien ba la shongbishar ia ka PIL No. 2/2022 kaba iadei bad ka Suo Motu halor ka kam tih dewiong beaiñ ha ka jylla Meghalaya.

Ka iingbishar ka la pynpaw ba une u Superintendent of Police la pyntip ba ula don hapoh East Jaintia Hills naduh u snem 2021, bad kumta u la dei ban tip bha ha kaba iadei bad ka jinglong jingman hapoh ka district.

“Ka 19th interim report ka pynpaw ba une u Superintendent of Police lehse um lah ban tehlakam ha kaba iadei bad kane ka kam beaiñ,” ong ka iingbishar.

Ka iingbishar ka la ailad ruh ia ka sorkar jylla ba kan ai ia ka jubab sha ka 19th interim report bad ba ia mynta hi ym pat shym la shim ia ki sienjam kiba iadei bad ki jingpynkhein kyndon.

Nalor kata ka iingbishar ka la kyntu ruh ba u Deputy Commissioner ka East Jaintia Hills District lyngba ka hukum ban shim ia baroh ki sienjam ban pynthikna ba dei ban burom ia kane ka jingpynmih hukum jong ka iingbishar.