Hukum ka iingkashari ban pynlong jingtohkit halor ka jingiap u pulit na Assam ha NEPA

Syllad | The Rising MeghalayaMarch 22, 2025

Ka Iingkashari Meghalaya High Court ha ka 21 tarik Lber ka la hukum ban pyndep noh ia ka jingtohkit halor ka jingiap uwei u pulit ba wan shah hikai pyntbit hapoh North Eastern Police Academy (NEPA) ha Umiam hapoh ka 31 tarik u Jymmang 2025.

Ka iingkashari ka pynpaw ka jinglyngngoh ban iohsngew ba ym pat shym la lah ban pyndep wat hadien lai snem jong ka jingtohkit, bad kumta ruh ym pat shym la lah ban file ia ka chargesheet.

Na ka liang ki bor pulit ki la pyntip ba ka jingtohkit halor kane ka jingjia ka dang iai bteng, bad ka jingtohkit halor ka kam bymman ka la sdang.

Haba pynkut noh ia ka writ petition ba la mudui da u Birendra Pandit, ka iingkashari ba la khlieh da u Chief Justice IP Mukerji ka la ong ba ka Kashari kam don satia ka jingsngew ban tuklar halor ka jingiaid jong ka jingtohkit kam bymman.

“Watla katta ruh haba peit ia ki jingshisha halor kane ka mukotduma, ka Kashari ka la hukum ba ia ka jingtohkit dei ban pyndep noh hapoh ka 31 tarik Jymmang 2025 ka ban lam ban file ia ka chargesheet hapoh ka Iingkashari kaba shim bishar,” ong ka iingkashari.

“Hadien kata ka iingkashari kan iaid shakhmat ban shim bishar katkum ka ain bad ban pynkut noh kloi katkum ka jingshah jong ka Iingkashari,” ka la ong.

Lah ban kdew ba kane ka jingjia ka dei kaba la jia ha ka 9 tarik u Lber 2022. Katkum ka jingpynpaw na kawei ka liang, une u pulit uba wan na Assam u la ngam jyllop hapoh swimming pool jong ka Academy.

Hynrei, katkum ka jingpynpaw da kiba haiing hasem jong une u lanot kiba la ujor da ka ejahar, ka ong ba ki don haduh 29 ngut ki pulit hajan une u lanot ha ka por ba kane ka jingjia ka la jia bad kumta kim lah ban pdiang ba u ngam jyllop.