Hukum ka Iingkashari ia ka NHAI ban pyndep noh ka jingmaramot ia ka bynta jong ka surok NH-6 

Syllad | The Rising MeghalayaDecember 12, 2024

Ka ïingkashari Meghalaya High Court ka la hukum ia ka National Highways Authority of India (NHAI) ba kan pyndep noh ka jingmaramot ia ka bynta kaba 45 na ka 102/224 km jong ka surok National Highway (NH-6) hapdeng ka Jowai bad Ratacherra.

Na kane ka lynter jong ka surok 5 km ka dei kaba la jubor bha ka jingsniew. Kumta ka Ingkashari ka la hukum ia ka NHAI ba kan maramot shwa kyrkieh ia kane ka bynta kaba 5 km jong kane ka surok khnang ban pynsuk ia ka leit ka wan jong ki kali.

Ha ka 11 tarik Nohprah u S Sengupta uba mihkhmat ia katei ka NHAI u la pyntip sha ka ïingkashari ba ha ka jingpyntreikam ia ka hukum ka kashari ka kompeni ba pyntrei ka la maramot kyrkieh ia kane ka bynta jong ka surok kaba 5 km bad kular ban pyndep hapoh u bnai Lber 2025.

U K Khan, AAG uba mihkhmat ia ka Jylla u la pyntip ba ka sorkar ka la ai ia baroh ki jingiarap sha ka NHAI ban pynthikna na ka bynta ka jingiaid beit jong ki kali ha ka por ba ka jingmaramot ia ka surok ka dang iaid shakhmat.

Hadien ba la shong bishar ia ka PIL ba la mudui da u (L) Advocate Kynjaimon Amse, ka ïingkashari kaba kynthup ia u Chief Justice IP Mukerji bad Justice B Bhattacharjee kala ong, “Halor kine baroh, ngi la bthah ia u S Panthi u Amicus Curiae uba la shemphang ba un pynlong ka jingleit jurip ia kane ka bynta jong ka surok kaba sniew bad ban ai ia ka kaiphod ba lyngkot shwa ka tarik ba lah ban pynphai ha kaba iadei bad ka jingai jingmut jong u S. Sengupta ba la pyndep ia ka jingmaramot ia kane ka bynta”.

“Ngi la bthah ruh ba ka jingmaramot ia ka bynta kaba sah jong ka bynta kaba 45 km ka dei ban bteng ha ban da dep kumba la kular da u S Sengupta. Ka Sorkar Jylla ruh ka dei ban ai ia baroh ki lad jingiarap sha ka NHAI khnang ban lah ban pyniaid beit ha kaba iadei bad ka leit ka wan jong ki kali katba ka jingmaramot ka dang iaid shakhmat,” ka la ong.

“Ngin sa shong bishar biang ia kane ka kam ha ka 5 tarik u Rymphang 2025 ban ioh pdiang ia ka kaiphot na u Amicus Curiae,” ka la bynrap.